ठाणे: अवघे पन्नास रुपये चोरल्यामुळे आपल्याच करण या दहा वर्षीय मुलाला बेदम मारहाण करुन त्याचा पित्यानेच खून केल्याची घटना गुरुवारी समोर आली आहे. याप्रकरणी आरोपी पिता संदीप उर्फ बबलू प्रजापती याला अटक केल्याची माहिती सहायक पोलीस आयुक्त व्यंकट आंधळे यांनी शुक्रवारी दिली. त्याला 5 जानेवारीपर्यत पोलीस कोठडीत ठेवण्याचे आदेश ठाणो न्यायालयाने दिले आहेत. विशेष म्हणजे एक आठवडयांपूर्वीही कळव्यातच एका महिलेने तिच्या पाच महिन्यांच्या मुलाचाही भीतीपोटी खून केला होता.
कळव्यातील वाघोबानगर, ठाकुरपाडा झोपडपट्टी येथे संदीप उर्फ बबलू प्रजापती हा पत्नी आणि दोन मुलांसह वास्तव्याला आहे. २९ डिसेंबर रोजी दुपारी त्याचा मुलगा करण याने घरातून पन्नास रुपये चोरले होते. ही बाब समजल्यानंतर त्याने मुलास जबर मारहाण केली. याच अमानुष मारहाणीत त्याच्या दोन्ही हाताला, पायाला फ्रॅक्चर झाले. तसेच डोक्याचीही कवटी फुटल्याने तो बेशुद्ध पडला. त्यानंतरही या निर्दयी पित्याने त्याला घरातच एका चादरीत गुंडाळून ठेवले. नंतर त्यास घरात कोंडून दरवाजा बंद ठेवला. हा प्रकार २९ डिसेंबर रोजी रात्री ११.३० वाजण्याच्या सुमारास घडला. परिसरातील नागरिकांनी या घटनेची खबर दुसऱ्या दिवशी कळवा पोलिसांना दिली. १२ तासांहून अधिक काळ मुलगा घरात बेशुद्ध अवस्थेत बंद असल्याची माहिती मिळताच वरिष्ठ पोलीस निरीक्षक मनोहर आव्हाड, सुदेश आजगावकर, जितेंद्र कुंवर आणि उपनिरीक्षक किरण बघडाणो आदींच्या पथकाने घटनास्थळी धाव घेतली. तेव्हा घरातच या मुलाला चादरीत गुंडाळल्याचे आढळले. पोलिसांनी त्याला तातडीने कळवा येथील छत्रपती शिवाजी रुग्णालयात दाखल केले असता, तो मृत पावल्याचे डॉक्टरांनी घोषित केले.
बहिणीचा फोटो Whats App स्टेटसवर ठेवल्याच्या रागातून मित्राने मित्राला चाकूने भोसकले
मुलाच्या अंगावर जबर मारहाणीच्या जखमा आढळल्या. त्याच्या डोक्याची कवटीही फुटल्याचे डॉक्टरांनी सांगितले. भाऊ करण याने घरातून पन्नास रुपये चोरल्यामुळे पप्पानी त्यास मारहाण करून मारून टाकले, अशी माहिती करणच्या लहान बहिणीने पोलिसांना सांगितले. त्यानंतर कळवा, वाघोबानगर भागात फिरणा:या आरोपी संदीप याला अटक केली. संदीप हा मद्यपी असून तो त्याच्या पत्नी आणि मुलांनाही मारहाण करीत असल्याची बाब चौकशीत समोर आल्याचे पोलिसांनी सांगितले.