पुणे : न्यायालयात जामिनासाठी बनावट कागदपत्रे तयार करणार्‍या टोळ्यांचा पुणेपोलिसांनी पर्दाफाश केला आहे. शिवाजीनगर न्यायालयाच्या आवारात एकावेळी छापे घालून पोलिसांनी १३ जणांना अटक केली. तसेच २२ जणांवर गुन्हा दाखल करण्यात आला असून शिवाजीनगर पोलीस ठाण्यात चार गुन्हे दाखल केले गेले आहेत.
शिवाजीनगर, लष्कर, वडगाव यासह वेगवेगळ्या न्यायालयात चोरी, जबरी चोरी, घरफोड्या, दरोडा आणि पॉस्को सारख्या गंभीर गुन्ह्यात अटक केलेल्या आरोपींना जामीन मिळवून देण्यासाठी बोगस कागदपत्रे तयार करुन ते न्यायालयात सादर करत असे. यामध्ये आधार कार्ड, रेशन कार्ड आणि सात बारा उतारे बनावट तयार केली जात.
ती जामिनासाठी न्यायालयात सादर करुन जामीन मिळवून दिला जात असे. जामीन मिळाल्यावर हे आरोपी पोलीस ठाण्यात किंवा न्यायालयात पुढील तारखांना हजर रहात नसत. त्यांची गुन्हेगारी कृत्ये मात्र सुरु रहात होती. याबाबतची माहिती पोलीस आयुक्त अमिताभ गुप्ता यांना मिळाली. त्यानुसार परिक्षाविधीन पोलीस अधिकार्‍यांच्या पथकाने शिवाजीनगर न्यायालयाच्या परिसरात मंगळवारी दुपारी एकाचवेळी सर्व बाजूने साध्या वेशात वेढा दिला. आरोपींना जामीन मिळवून देण्यासाठी कार्यरत असलेल्या या आरोपींना ताब्यात घेतले.
लष्कर पोलीस ठाण्यातील उपनिरीक्षक प्रदीप साखरे यांच्या फिर्यादीनुसार पोलिसांनी निलेश नंदकुमार शहाणे (वय २७, रा. दत्तवाडी), महारुद मंदरे (वय २६, रा. माणिकबाग), असिफ शेख (वय २७, रा. क़ात्रज), मोहसिन सय्यद (वय ४८, रा. दळवीनगर, निगडी), रशिद सय्यद (वय ४९, रा. शांतीनगर), अमीर मुलाणी (वय ४४, रा. चिंचवड) यांना अटक करण्यात आली असून रणजित सूर्यवंशी आणि गोपाळ कांगणे यांच्यावर गुन्हा दाखल करण्यात आला आहे.
शिवाजीनगर न्यायालयाच्या गेट ४ पासून काही अंतरावर एका एजंटला पोलिसांनी पकडले. नागेश माणिक बनसोडे (वय ३९, रा. पिंपरी) याला अटक केली आहे. तसेच भावेश शिंदे (वय ३३, रा. सोलापूर बाजार, वानवडी), विकी पुडगे (वय २८, रा. पिंपळेनगर, सांगवी), कल्पेश इंगोले (वय १८), सोनू अशोक जगधने (वय २९, रा. पुणे रेल्वे स्टेशन), शशांक साळवी (वय ३१, रा. दापोडी), शुभम लांडगे (वय १९, रा. देहुरोड) यांना अटक करण्यात आली आहे.याशिवाय दाविद पहिलवान (वय २७, रा.दापोडी), विशाल गरड (वय ३३, रा.आनंदनगर, चिंचवड), विलास धेंडे (वय ५७, रा.पर्वतीदर्शन) सुरेश डेंगळे (वय २५, रा.चिखली), प्रमोद जगताप (वय ५८, रा.बारामती), प्रविण ससाणे (वय ४४, रा.बालेवाडी फाटा), मारुती कुदळे (वय ४३, रा.नाना पेठ), रणजित सूर्यवंशी आणि गोपाळ कांगणे यांच्याविरुद्ध गुन्हा दाखल केला आहे.