सदानंद नाईक
उल्हासनगर : कॅम्प नं-२ अवतराम चौक येथील फुटपाथ वरील अतिक्रमण हटविण्यासाठी गेलेल्या कर्मचाऱ्यांना हातगाडीचालकांनी धमकी व धक्काबुक्की केल्याचा प्रकार बुधवारी रात्री ९ वाजता झाला. याप्रकरणी उल्हासनगर पोलीस ठाण्यात दोन महिला विरोधात गुन्हा दाखल झाला असून अधिक तपास पोलीस करीत आहेत.
उल्हासनगरात फेरीवाले विरोधात व्यापारी असा संघर्ष उभा ठाकला असतांना बुधवारी रात्री ९ वाजता अवतराम चौक परिसरात फुटपाथवर अतिक्रमण करणाऱ्या विरोधात कारवाईसाठी महापालिका पथक गेले होते. यावेळी भाजी विक्री करणाऱ्या पूनम वाघरी व राखी वाघरी यांनी कारवाईला विरोध करून वाहतुकीस अडथळा होत नाही. असे सांगितले. महापालिका कर्मचारी राजू मोरे, दिलीप भोईर, गंगाराम मोरे व रणजित ठाकूर आदींनी त्यांची समजूत काढण्याचा प्रयत्न केला. मात्र ऐकण्याच्या मनस्थितीत नसणाऱ्या पूनम व राखी वाघरी यांनी महापालिका अतिक्रमण कर्मचाऱ्यांना शिवीगाळ व धमकी देऊन धक्काबुकीं केली. याप्रकारने परिसरात तणाव निर्माण झाला. याप्रकरणी उल्हासनगर पोलीस ठाण्यात दोन्ही महिला विरोधात गुन्हा दाखल झाला आहे. अधिक तपास पोलीस करीत आहेत.