मीरारोड - कारवर चालक म्हणून राहतो सांगून एका भामट्याने कार परस्पर दुसऱ्याला विकून कार मालकाची फसवणूक केल्याचा गुन्हा काशिगाव पोलिसांनी दाखल केला आहे.
काशिगावच्या डाचकुलपाडा भागात राहणारे संतोषकुमार जयस्वाल यांची कार आहे . त्यांच्या कार वर चालक म्हणून राहतो असे सांगून शुभम रामटेके नावाच्या व्यक्तीने खात्री पटावी म्हणून स्वतःच्या आधार कार्ड, पॅन कार्ड व ड्रायव्हिंग लायसन्स ची झेरॉक्स दिली. शुभम याने ओळखीचे पुरावे म्हणून कागदपत्रे दिल्या नंतर जयस्वाल याने शुभम ह्याला गाडी चालवण्यास ठेवले.
गाडी हातात मिळाल्या नंतर शुभम याने ती परस्पर विकून टाकली . शुभम याने आपल्या विश्वासघात करून परस्पर गाडी विकून फसवणूक केल्याचे लक्षात आल्या नंतर जयस्वाल यांनी काशिगाव पोलीस ठाण्यात फिर्याद दिली . पोलिसांनी शुभम वर गुन्हा दाखल केला आहे . ३ लाख रुपये किमतीची गाडी विश्वासाने फसवणूक करत विक्री केल्याप्रकरणी काशिगाव पोलिसांनी आरोपी शुभम रामटेके याचा शोध चालवला आहे . वरिष्ठ पोलीस निरीक्षक राहुलकुमार पाटील यांच्या मार्गदर्शनाखाली पोलीस अधिक तपास करीत आहेत .