बॉलीवूडचा अभिनेता सिद्धांत कपूरला जामीन मिळाला आहे. रेव्ह पार्टीवर छापा टाकून बंगळुरू पोलिसांनी रविवारी रात्री त्याच्यासह सहा जणांना अटक केली होती. वैद्यकीय चाचणीत सिद्धांतने ड्रग्जचे सेवन केल्याचे समोर आले होते. सिद्धांत हा ज्येष्ठ अभिनेता शक्ती कपूर यांचा मुलगा आणि अभिनेत्री श्रद्धा कपूरचा भाऊ आहे.
आतापर्यंत या प्रकरणात पाच जणांना जामीन मिळाला आहे. बेंगळुरुचे विभागिय डीसीपी भीमा शंकर यांनी सांगितले की, सिद्धांतसह आणखी चार जणांना जामिन मिळाला आहे. जेव्हा पोलीस चौकशीला बोलावतील तेव्हा त्याला यावे लागणार आहे. जामिन मिळालेल्यांमध्ये सिद्धांत कपूर, अखिल सोनी, हरजोत सिंह, हनी, अखिल यांचा समावेश आहे. बंगळूरूतील एमजी रोडवरील एका हॉटेलमध्ये रेव्ह पार्टी सुरु होती, तिथे सिद्धांतही होता. तो तिथे डीजेचे काम करत होता.
रेव्ह पार्टीमध्ये १४ तरुणी आणि २१ पुरुष होते. सर्व लोकांनी आपण ड्रग्ज घेतले नसल्याचे चौकशीत पोलिसांना सांगितले होते. परंतू, सिद्धांत कपूर आणि अन्य चार जणांची चाचणी पॉझिटिव्ह आली आहे.