"पापा सॉरी, लिहिलंय ते वाचून घ्या"; 'कोरियन गेम'च्या विळख्याने तीन बहि‍णींनी स्वतःला एकत्र संपवलं

मोबाईल गेमिंगच्या नादात तीन बहिणींनी मृत्यूला कवटाळल्याची धक्कादायक घटना उत्तर प्रदेशातून समोर आली आहे.

Ghaziabad 3 Sisters Die: मोबाईल गेमिंगच्या विळख्याने उत्तर प्रदेशात एका कुटुंबाचा भीषण अंत केला आहे. गाझियाबादमधील टीला मोड परिसरात असलेल्या भारत सिटी सोसायटीमध्ये तीन सख्ख्या अल्पवयीन बहिणींनी ९ व्या मजल्यावरून उडी मारून सामूहिक आत्महत्या केली. या धक्कादायक घटनेने केवळ उत्तर प्रदेशच नाही, तर संपूर्ण देश हादरला आहे. कोरियन लवर या टास्क-बेस्ड ऑनलाइन गेमच्या आहारी गेल्यामुळे या मुलींनी हे टोकाचे पाऊल उचलल्याचा प्राथमिक संशय आहे.

मिळालेल्या माहितीनुसार, निशिका (१६ वर्षे), प्राची (१४ वर्षे) आणि पाखी (१२ वर्षे) या तिघी बहिणी आपल्या कुटुंबासह भारत सिटी सोसायटीच्या बी-१ टॉवरमधील ९०७ क्रमांकाच्या फ्लॅटमध्ये राहत होत्या. मंगळवारी रात्री २ च्या सुमारास या तिघींनी एकमेकींचे हात पकडून बाल्कनीतून खाली उडी घेतली. जमिनीवर पडण्याच्या जोराच्या आवाजाने सोसायटीमधील रहिवाशांना जाग आली, त्यांनी धाव घेतली असता तिघी रक्ताच्या थारोळ्यात पडलेल्या दिसल्या.

सुसाईड नोट आणि डायरी

पोलिसांना घटनास्थळी एक सुसाईड नोट आणि एक डायरी सापडली आहे. सुसाईड नोटमध्ये एका रडणाऱ्या मुलीचे इमोजी काढून तिघींनी, "आय एम सॉरी पापा... आई लव्ह यू मम्मी-पापा. या डायरीत जे काही लिहिले आहे ते सर्व वाचून घ्या, कारण तेच सत्य आहे," असं लिहीले. या डायरीमध्ये तिघींनी 'वी लव्ह कोरियन गेम्स' असेही नमूद केले आहे. मात्र, डायरीतील सविस्तर मजकूर अद्याप पोलिसांनी उघड केलेला नाही.

'कोरियन लवर' गेमचा जीवघेणा टास्क?

मृत मुलींचे वडील चेतन कुमार यांनी सांगितले की, कोरोनापासून तिन्ही मुलींना मोबाईल गेमचे प्रचंड व्यसन लागले होते. त्या कोरियन लव्हर नावाचा ऑनलाइन टास्क-बेस्ड गेम खेळायच्या. या गेमची सवय इतकी भयानक होती की, तिघींचे खाणे, पिणे, झोपणे आणि शाळेत जाणे हे सर्व एकाच वेळी चालायचे. याच व्यसनापोटी त्यांना एखादा जीवघेणा टास्क मिळाला होता का? याचा तपास आता पोलीस करत आहेत.

गाझियाबाद पोलिसांनी तिन्ही मुलींचे मोबाईल फोन जप्त केले असून ते फॉरेन्सिक लॅबमध्ये पाठवले आहेत. सध्या हे फोन लॉक असून, ते उघडल्यानंतरच या आत्महत्येमागील नेमके गूढ उकलण्याची शक्यता आहे. पोलिसांनी सांगितले की, या मुलींचे शालेय शिक्षणही नियमित सुरू नव्हते आणि त्या तासन् तास मोबाईलमध्ये गुंग असायच्या.