सदानंद नाईक
उल्हासनगर : शांतीनगर येथे सुरू असलेल्या अवैध बांधकाम थांबविण्यासाठी गेलेल्या महापालिकेच्या दोन कर्मचाऱ्यांना भूमाफियांनी एका खोलीत कोंडून मारहाण केल्याचा प्रकार शनिवारी घडला. याप्रकरणी ब्रह्माणे यांच्यासह अन्य जनावर मध्यवर्ती पोलीस ठाण्यात गुन्हा दाखल झाला.
उल्हासनगर कॅम्प नं-३ शांतीनगर परिसरात सुरू असलेल्या एका अवैध बांधकामाला प्रभाग समिती क्रं-१ च्या अधिकाऱ्यांनी नोटीस बजावून कामबंद ठेवण्याचे बजावले होते. मात्र महापालिकेच्या नोटिसला केराची टोपली दाखवून बांधकाम सुरूच ठेवण्यात आले. याची माहिती समिती मधील बिट मुकादम प्रकाश सकट व आत्माराम सोनावणे यांना मिळल्यावर, त्यांनी शनिवारी सुट्टी असताना अवैध बांधकाम ठिकाणी सकाळी साडे अकरा वाजता धाव घेतली. त्यांनी बांधकाम थांबविण्याची विनंती केल्यावर, बांधकाम सुरूच ठेवून दोघांना एका खोलीत नेण्यात आले. तसेच त्यांना मारहाण केली. झालेल्या प्रकारची माहिती वरिष्ठांना दिल्यावर मध्यवर्ती पोलीस ठाण्यात धाव घेऊन तक्रार दाखल केली. पोलिसांनी तक्रारीवरून ब्रह्माणे यांच्यासह ६ पेक्षा जास्त जनावर गुन्हा दाखल केल्याची माहिती महापालिकेचे सहायक आयुक्त गणेश शिंपी यांनी दिली. तसेच प्रभाग समिती क्रं-१ मधील अवैध बांधकामावर पाडकाम कारवाईचे संकेत त्यांनी दिले.
शहरात अवैध बांधकामाचा सुळसुळाट झाला असून सर्रासपणे आरसीसी व टी ग्रेटरची अवैध बांधकामे उभी राहत आहे. अवैध बांधकाम प्रकरणी भाजपच्या शिष्टमंडळाने गेल्या आठवड्यात आयुक्तांची भेट घेऊन निवेदन दिल्यावर, राणा डम्पिंग ग्राऊंडच्या पायथ्याशी उभे राहत असलेल्या अवैध चाळीच्या बांधकामावर सहायक आयुक्त अनिल खतूरानी यांच्या पथकाने पाडकाम कारवाई केली. मात्र शहरातील इतर शेकडो बांधकामावर कारवाई कधी? असा प्रश्न निर्माण झाला. महापालिका आयुक्तांनी एक विशेष पथक स्थापन करून अवैध बांधकामावर धडक कारवाई करण्याची मागणी सर्वस्तरातून होत आहे.