रायपूर - छत्तीसगडमधील कोरबा येथे एका तरुणीचा मृतदेह रेल्वे ट्रॅकच्या शेजारी सापडल्याने खळबळ उडाली आहे. या तरुणीने तिच्या होणाऱ्या पतीला ट्रेनमधून शेवटचा व्हिडीओ कॉल केला होता. त्यानंतर काही काळाने तिचा मृतदेह ट्रॅकच्या बाजूला सापडला. तिने ट्रेनमधून उडी मारून आत्महत्या केली. पुढच्या महिन्यातच या तरुणीचा विवाह होणार होता. दरम्यान, तिच्या मृत्यूमुळे कुटुंबीयांवर दु:खाचा डोंगर कोसळला.
पोलिसांनी मृत तरुणीची ओळख अन्नपूर्णा पटेल अशी पटवली आहे. तसेच तिचा मृतदेह पोस्टमार्टेमसाठी पाठवला आहे. रेल्वे ट्रॅकवर पडलेल्या तरुणीच्या मृतदेहाच्या डोक्यावर जखमा झाल्या होत्या. त्यामुळे फॉरेन्सिक तज्ज्ञांन घटनास्थळी पाचारण करण्यात आले. तसेच रेल्वेतून निघालेली ही तरुणी घरी न पोहोचल्याने त्याची माहिती नातेवाईकांसह आसपासच्या रेल्वे स्टेशनमध्ये दिली गेली होती. शोध सुरू होता. मात्र काही वेळातच या तरुणीचा शोध लागला. मात्र तिचा मृतदेह सापडल्याने कुटुंबीयांवर दु:खाचा डोंगर कोसळला.
पोलिसांनी सांगितले की, अन्नपूर्णचा विवाह मे महिन्याच्या पहिल्या आठवड्यात होणार होता. मृत तरुणीच्या भावाने सांगितले की, एका दिवसापूर्वी अन्नपूर्ण टेलरला कपडे देण्यासाठी मौहार गावात जाते असे सांगून ती गेली होती. मात्र खूप वेळ झाल्यावर ती ट्रेनमध्ये असल्याचे समजले. मे महिन्याच्या पहिल्याच आठवड्यात लग्न असल्याने तयारी जोरात सुरू होती. मृत तरुणीचा साखरपुडा वर्षभरापूर्वी ठरला होता. मात्र कोरोना कोरोनामुळे हा विवाह पुढे ढकलण्यात आला होता. मात्र आता विवाह तोंडावर आला असताना तिनं हे टोकाचं पाऊल का उचललं हे समजू शकलेलं नाही.
दरम्यान, सीएसपी योगेश साहू यांनी या प्रकरणाचा तपास सुरू असल्याचे सांगितले. मिळत असलेल्या माहितीवरून तिने धावत्या ट्रेनमधून उडी मारली असावी, असे दिसते. तसेच त्यामुळे गंभीर दुखापत झाल्याने तिचा मृत्यू झाला असावा. आता पोस्टमार्टेमचा रिपोर्ट आणि पुढील तपासानंतर नेमकं कारण समोर येईल असं पोलिसांनी सांगितलं.