नवी दिल्ली - देशात अनेक धक्कादायक घटना घडत आहेत. याच दरम्यान नात्याला काळीमा फासणारी घटना घडली आहे. एका छोट्याशा कारणामुळे दिराने आपल्या वहिनीची गोळी झाडून हत्या केली आहे. मध्य प्रदेशमधील देवास जिल्ह्यात ही भयंकर घटना घडली. यानंतर त्याने स्वतःही आत्महत्या केली आहे. या घटनेनंतर परिसरात एकच खळबळ उडाली. पोलिसांनी दोघांचे मृतदेह शवविच्छेदनासाठी पाठवले आहेत. पोलीस या प्रकरणाचा अधिक तपास करत आहेत.
देवासच्या गोपालपुरा येथील संदीप नावाच्या व्यक्तीचा भाऊ विजय याचं आपल्या वहिनीसोबत जेवण गरम करण्यावरुन भांडण झालं. पोलिसांनी दिलेल्या माहितीनुसार, विजयने आपल्या वहिनीला जेवण गरम करण्यास सांगितलं. मात्र तिने नकार दिला. यानंतर BHMS डॉक्टर असलेली वहिनी आपल्या क्लिनिकमध्ये निघून गेली. मिळालेल्या माहितीनुसार काही वेळातच तिचा दीर क्लिनिकमध्ये पोहोचला आणि त्याने वहिनी रीनावर गोळी झाडली. यानंतर त्याने आपला भाऊ संदीपला फोन करून रीनाला गोळी मारल्याचं सांगितलं.
दिराने डॉक्टर वहिनीची हत्या करून स्वतःही केली आत्महत्या
फोन कट करून त्याने स्वतःवरही गोळी झाडत आत्महत्या केली. लोक जेव्हा क्लिनिकमध्ये पोहोचले तेव्हा रीना रक्ताच्या थारोळ्यात पडलेली होती. तिला रुग्णालयात नेण्यात आलं, मात्र डॉक्टरांनी तिला मृत घोषित केलं. पोलिसांनी सध्या दोघांचे मृतदेह शवविच्छेदनासाठी पाठवले आहेत आणि प्रकरणाचा तपास सुरू केला आहे. सुरुवातीच्या तपासात हे प्रकरण घरगुती वादाचं जाणवत असल्याचं पोलिसांनी सांगितलं. पोलिसांनी विजयच्या मृतदेहाजवळून घटनेत वापरण्यात आलेली गाडी आणि बंदुक दोन्ही जप्त केली आहे. एका हिंदी वेबसाईटने याबाबतचे वृत्त दिले आहे.