नवी दिल्ली - महिलांवरील अत्याचाराच्या, बलात्काराच्या अनेक घटना या सातत्याने समोर येत आहेत. अशीच एक नात्याला काळीमा फासणारी घटना घडली आहे. पतीने आपल्या पत्नीवर देहविक्रीसाठी दबाव आणल्याची भयंकर घटना आता समोर आली आहे. धक्कादायक बाब म्हणजे तिने नकार दिल्यावर पतीने तिला बेदम मारहाण करत तिचं मुंडण केलं आहे. झारखंडच्या जामतारामध्ये ही संतापजनक घटना घडली. या घटनेने परिसरात एकच खळबळ उडाली आहे. पत्नीला मारहाण करून आणि जीवे मारण्याची धमकी देऊन देहविक्री करण्यासाठी तिच्यावर दबाव आणला. मात्र अखेर पत्नीने पोलिसांत धाव घेत याबाबत तक्रार केली आहे.
मिळालेल्या माहितीनुसार, झारखंडच्या गोड्डा जिल्ह्यातील देवदाडमध्ये राहणाऱ्या आठवीतील मुलीचं तिच्या शेजारी राहणाऱ्या मुस्तकीम अन्सारीवर प्रेम जडलं होतं. शाळेत येता जाता ते एकमेकांना रोज पाहायचे. यातूनच पुढे त्यांचं प्रेमप्रकरण सुरू झालं. यानंतर याच वर्षी जानेवारीमध्ये मुलीने डायव्हर असलेल्या मुस्तकीम सोबत मुस्लीम रितीरिवाजाप्रमाणे निकाह केला. निकाहानंतर ती जेव्हा सासरी आली तेव्हा तिला मुस्तकीमचा पहिला निकाह झाल्याची माहिती समजली आणि मोठा धक्काच बसला.
मुस्तकीमला पहिली पत्नी आणि सात मुलं
मुस्तकीमला पहिली पत्नी आणि सात मुलं होती. निकाहा आधी त्याने ही माहिती लपवून ठेवली होती. ही बाब लक्षात आल्यामुळे धक्का बसलेल्या मुलीने सासर सोडून पुन्हा माहेरी येण्याचा महत्त्वाचा निर्णय घेतला. जवळपास सात महिने ती माहेरी राहिली. मात्र मुस्तकीमने तिला समजावून पुन्हा घरी नेलं. सासरी गेल्यानंतर मात्र मुस्तकीमनं आपल्या दुसऱ्या पत्नीवर अऩ्याय करायला सुरुवात केली. तिने देहविक्री करण्यासाठी तयार व्हावं आणि त्याचे पैसे आपल्याला द्यावेत, अशी जबरदस्ती करायला त्याने सुरुवात केली. मुस्तकीम आणि त्याची पहिली पत्नी हे दोघं मिळून तिला मारहाण करू लागले.
बेदम मारहाण करून केलं मुंडण
मुलीला अनेकदा शॉकदेखील देण्यात आला. ती देहविक्रीसाठी तयार झाली नाही म्हणून रेल्वे ट्रॅकवर टाकून तिचा जीव घेण्याची धमकीदेखील दिली. तिला बेदम मारहाण केली आणि तिचं मुंडण केलं. रोजच्या अन्यायाला कंटाळलेल्या मुलीने अखेर पोलिसांत धाव घेत याबाबत तक्रार दाखल केली. पोलिसांनी या प्रकरणी तपास सुरू केला असून दोषींवर कारवाई करण्याचा इशारा दिला आहे. या प्रकरणी पोलीस काही लोकांची चौकशी करत आहेत. एका हिंदी वेबसाईटने याबाबतचे वृत्त दिले आहे.