प्रेमासाठी काय पण! बँक मॅनेजर डेटिंग App वरील गर्लफ्रेंडवर झाला खूश; ट्रान्सफर केले 5.7 कोटी 

Crime News : हरीशंकर असं त्याचं नाव असून हा प्रकार उघड झाल्यानंतर त्याला अटक करण्यात आली आहे.

नवी दिल्ली - एका बँक मॅनेजरने डेटिंग अ‍ॅपवरील गर्लफ्रेंडच्या खात्यामध्ये तब्बल 5 कोटी 70 लाख रूपये पाठवल्याची धक्कादायक घटना समोर आली आहे. बंगळुरूमधील हनुमंत नगरमधील इंडियन बँक मॅनेजरनं हा कारनामा केला आहे. हरीशंकर असं त्याचं नाव असून हा प्रकार उघड झाल्यानंतर त्याला अटक करण्यात आली आहे. इंडियन बँकेच्या झोनल मॅनेजरनं केलेल्या तक्रारीनंतर स्थानिक पोलिसांनी या प्रकरणात तक्रार दाखल केली आहे. या प्रकरणातील आरोपी मॅनेजरला 10 दिवसांच्या पोलीस कोठडीत पाठवण्याचे आदेश कोर्टानं दिले आहेत. 

प्राथमिक माहितीनुसार या ब्रँचचा सहाय्यक मॅनेजर आणि क्लार्क याांचाही या प्रकरणात समावेश आहे. 13 ते 19 मे दरम्यान हा प्रकार घडला आहे. सायबर गुन्हेगारांनी आपल्याला एक डेटिंग अ‍ॅप वापरण्याचे प्रलोभन दिले होते असा दावा बँक मॅनेजरनं केला आहे. त्याच्या या दाव्याची सत्यता पडताळण्याचं काम पोलीस करत आहेत. या प्रकरणातील तक्रारीनुसार, 'एका महिला ग्राहकाने 1.3 कोटी रूपये फिक्स डिपॉझिट म्हणून बँकेत जमा केले होते. त्यानंतर त्याच डिपॉझिटच्या आधारावर महिलेनं 75 लाखांचे कर्ज घेतले. 

महिलेनं सर्व आवश्यक कागदपत्र जमा केले. आरोपी अधिकाऱ्याने या कागदपत्रांमध्ये फेरफार केला. इतकंच नाही तर आरोपीनं अनेक टप्प्यात ओव्हरड्राफ्ट म्हणून 5.7 कोटी रूपये जमा केले. हे सर्व पैसे पश्चिम बंगालमधील वेगवेगळ्या बँकांच्या 28 खात्यांमध्ये पाठवण्यात आले होती. कर्नाटकातील दोन बँक खात्यामधील 136 व्यवहारांतून हे पैसे पाठवण्यात आले आहेत. हरीशंकरने या प्रकरणात त्याचा सहाय्यक मॅनेजर आणि क्लार्कची मदत घेतल्याचा आरोप आहे. मात्र त्याचे अद्याप स्पष्ट पुरावे सापडलेले नाहीत. या दोघांचीही पोलिसांकडून चौकशी सुरू आहे.

हे सर्व प्रकरण उघड होताच इंडियन बँकेचे झोनल मॅनेजर डीएस मूर्ती यांनी तक्रार दाखल केली. या तक्रारीच्या आधारावर पोलिसांनी मॅनेजर हरीशंकर आणि अन्य दोन कर्मचाऱ्यांवर फसवणूक आणि गुन्हेगारी कट रचण्याची तक्रार दाखल केली आहे. पोलिसांच्या चौकशीत मॅनेजरनं डेटिंगची कबुली दिली आहे. त्यानंतर त्याला कोर्टात सादर करण्यात आले. त्यावेळी कोर्टाने त्याची 10 दिवसांच्या पोलीस कोठडीत रवानगी केली आहे. एका हिंदी वेबसाईटने याबाबतचे वृत्त दिले आहे.