जयपूर - राजस्थानमधील बांसवाडा पोलिसांनी घर सोडून दिल्लीला जात असलेल्या महिलेवर बलात्कार केल्याच्या आरोपाखाली एका बाबाला अटक केली आहे. पोलिसांनी त्याला कोर्टात हजर केले असता कोर्टाने त्याला दोन दिवसांची रिमांड सुनावली आहे. आरोपी बाबा पीडित महिलेला नोकरी लावण्याच्या बहाण्याने घेऊन गेला. त्यानंतर त्याने मध्य प्रदेशमधील नीचम येथे नेऊन तिच्यावर बलात्कार केला. त्यानंतर त्याने या चुकीसाठी महिलेकडे माफी मागितली. या घटनेनंतर तो बाबा या महिलेला घेऊन जात होता. तेवढ्यात या महिलेने आरडाओरडा करून गर्दी जमवली. त्यानंतर जमावाने या बाबाला बेदम मारहाण केली आणि त्याला पोलिसांच्या ताब्यात दिले.
याबाबत पोलिसांनी सांगितले की, या परिसरातील एका महिलेचं चार दिवसांपूर्वी पतीशी भांडण झालं होतं. पतीवर रागावून ही महिला आपल्या एक वर्षाच्या मुलाला घेऊन घरातून निघून गेली. एक रात्र तिने एका चावडीवर घालवली. दुसऱ्या दिवशी लसोडियामध्ये बांधकाम सुरू असलेल्या गोशाळेत देखभाल करत असलेल्या बाबा रामस्वरूप उर्फ राजेंद्र मीणाची नजर तिच्यावर गेली. त्याने महिलेचं दु:ख ऐकलं आणि तिला रोजगार देण्याचे आमिष दाखवून आपल्यासोबत दुचाकीवरून नेलं.
त्यानंतर आरोपी बाबा महिला आणि तिच्या मुलाला घेऊन कोटाऐवजी १५८ किमी दूर मध्य प्रदेशमधील नीमच येथील भादवा माता मंदिरात घेऊन गेला. दुसऱ्या दिवशी त्याने महिलेला आंघोळीसाठी नदीवर जाण्यास सांगितले. ती नदीवर गेल्यावर तोही तिच्या मागून गेला आणि त्याने त्या महिलेवर बलात्कार केला. त्यानंतर या चुकीसाठी त्याने तिची माफीही मागितली.
दरम्यान, हा बाबा या महिलेला कोटा येथे परत आणत असताना एकेठिकाणी गर्दी पाहून महिलेने आरडाओरड केली. त्यामुळे जमाव गोळा झाला. तिथे या महिलेने तिची कहाणी ऐकवली. त्यानंतर जमावाने या बाबाला पकडले आणि त्याला बेदम मारहाण करत पोलिसांच्या स्वाधीन केले.