नवी दिल्ली - उत्तर प्रदेशच्या इटावा जिल्ह्यामध्ये एक धक्कादायक घटना घडली आहे. सासरच्या मंडळींच्या त्रासाला कंटाळून एका तरुणाने टोकाचं पाऊल उचललं आणि आत्महत्या करून जीवन संपवल्याची भयंकर घटना समोर आली आहे. 'माझ्या मृत्यूला माझी पत्नी जबाबदार आहे' असं म्हणत फेसबुकवर सुसाईड नोट लिहिली आहे. तरुणाने गळफास घेऊन आत्महत्या केल्याने परिसरात एकच खळबळ उडाली आहे. तरुणाला सासरची मंडळी आणि पत्नी यांनी मारहाण केली होती. त्यामुळेच त्याने टोकाचा निर्णय घेतला.
मिळालेल्या माहितीनुसार, भूपेंद्र असं तरुणाचं नाव असून तो अहमदाबादमध्ये नोकरी करत होता. त्याचे वडील राम बहादूर दिवाकर यांनी दिलेल्य़ा माहितीनुसार, भूपेंद्रचं लग्न 2016 मध्ये रुकवा गावच्या मूर्ती देवी सोबत झालं होतं. त्यानंतर ते दोघं अहमदाबादमध्ये राहत होते. रविवारी संध्याकाळी अचानक मुलगा घरी आला आणि आम्हाला त्याने सासरच्या मंडळींनी त्याला बेदम मारहाण केल्याचं सांगितलं. यानंतर त्याने खोलीत जाऊन गळफास घेऊन आत्महत्या केली. मुलाला गळफास घेतलेलं पाहून कुटुंबियांना मोठा धक्का बसला आहे.
घटनेची माहिती मिळताच पोलीस घटनास्थळी दाखल झाले आहे. त्यांनी मृतदेह ताब्यात घेतला असून तो शवविच्छेदनासाठी पाठवण्यात आला आहे. तरुणाच्या आईवडिलांनी सुनेच्या कुटुंबीयांवर गंभीर आरोप केले आहेत. तरुणाने मृत्यू आधी फेसबुकवर सुसाईड नोट लिहिली होती. ज्यामध्ये त्याने आपल्या मृत्यूसाठी आपल्या पत्नीला जबाबदार धरलं आहे. तसेच त्याने पत्नीच्या नावाचा एक टॅटू काढला होता. मात्र तो देखील आत्महत्येआधी त्याने सुरीने वार करुन मिटवण्याचा प्रयत्न केला. पोलीस या प्रकरणाचा अधिक तपास करत आहेत. एका हिंदी वेबसाईटने याबाबतचे वृत्त दिले आहे.
धक्कादायक! 'तो' वाद विकोपाला गेला; पतीच्या एका शब्दामुळे नाराज झालेल्या पत्नीने कापली जीभ
पती- पत्नीमध्ये अनेकदा कौटुंबिक कारणांवरून वाद होत असतात. काही वेळा हे वाद विकोपाला देखील जातात अशीच एक घटना आता घडली आहे. उत्तर प्रदेशमध्ये पतीसोबत झालेल्या किरकोळ वादातून एका महिलेने टोकाचं पाऊल उचललं आहे. पतीचा एक शब्द जिव्हारी लागल्याने पत्नी खूप नाराज झाली होती. तिने ब्लेडने स्वतःची जीभ कापून रस्त्यावर फेकल्याची धक्कादायक घटना समोर आली आहे. उत्तर प्रदेशच्या बिजनौर जिल्ह्यात ही भयंकर घटना घडली आहे. जिल्ह्यातील रसूलपूर नागला गावात हा प्रकार घडला. पती पत्नीमध्ये काही तरी किरकोळ कारणांवरून वाद सुरू झाला. त्यांच्यातील भांडणामध्ये पतीने पत्नीवर ओरडत तिला वाद घालणारी म्हटलं आणि तोच शब्द पत्नीच्या जिव्हारी लागला. पतीच्या शब्दांमुळे दुखावलेल्या पत्नीने धक्कादायक पाऊल उचललं.