नवी दिल्ली - राजस्थानमधील जालौरे जिल्ह्यामध्ये नात्याला काळीमा फासणारी एक घटना समोर आली आहे. जन्मदाता बापच हैवान झाला असून आपल्या मुलीवर बलात्कार केला आहे. धक्कादायक बाब म्हणजे पीडितेच्या भावाला बहिणीवर झालेल्या अत्याचाराची माहिती मिळाल्यानंतर त्याने आत्महत्या केली आहे. पोलिसांनी याबाबत माहिती दिली आहे. बहिणीवर वडिलांनीच केलेला अत्याचार सहन न झाल्याने भावाने टोकाचं पाऊल उचललं आणि आत्महत्या करुन जीवन संपवलं आहे. पोलिसांनी दिलेल्या माहितीनुसार या पीडित मुलीने तिच्यासोबत घडलेला सर्व धक्कादायक प्रकार आपल्या एका नातेवाईकाला सांगितला.
नातेवाईकाने मुलीसोबत घडलेल्या प्रकाराची एक ऑडिओ क्लिप तयार केली. ही ऑडिओ क्लिप मुलीच्या भावाने ऐकली. त्यानंतरच त्याने आत्महत्या करुन आपलं आयुष्य संपवलं. शनिवारी ही 32 मिनिटांची ऑडिओ क्लिप व्हायरल झाल्यानंतर पोलिसांनी या प्रकरणाचा तपास सुरू केला. मात्र त्याच दिवशी या मुलीच्या भावाने नर्मदा नदीच्या कालव्यात उडी मारुन आत्महत्या केली. आपल्या केलेल्या कृत्याची माहिती पोलिसांपर्यंत पोहचल्याचं समजताच आरोपी पित्याने आपल्या राहत्या घरातून पळ काढला. पोलीस सध्या त्याचा शोध घेत आहेत.
जन्मदाता बापच झाला हैवान, केला बलात्कार
व्हायरल झालेल्या ऑडिओ क्लिपमध्ये या मुलीने मोबाईल घेऊन देतो असं सांगून आपल्याला कारमध्ये नेलं आणि तिथे वडिलांनीच आपल्यावर बलात्कार केल्याचं सांगितलं आहे. मात्र बलात्काराची ही घटना नेमकी कधी घडली यासंदर्भातील माहिती समोर आलेली नाही. तसेच या क्लिपमध्ये ही पीडित मुलगी त्या दिवशी तिच्या आईने हिच्या भावालाही सोबत घेऊन जा असं आरोपीला सांगितलं होतं मात्र त्यांनी याला नकार दिल्याचंही म्हटलं आहे. तसेच या ऑडिओ क्लिपमध्ये पीडितेने यापूर्वीही तिच्या वडिलांनी तिचं लैंगिक शोषण केल्याचं म्हटलं आहे.
पोलीस या प्रकरणाचा करताहेत तपास
मी झोपेत असायचे तेव्हा ते माझ्यावर लैंगिक अत्याचार करायचे असं या मुलीने म्हटलं आहे. माझे वडील मला एकटीला कधी बाहेर जाऊ द्यायचे नाही तसेच ते कुटुंबातील इतर व्यक्तींशी मला बोलूही द्यायचे नाहीत असंही या मुलीने म्हटलं आहे. वडिलांच्या या वागण्याला कंटाळून एकदा आपण त्यांना विरोध करताना त्यांच्यावर ओरडल्यानंतर आईने आपल्यालाच दम भरल्याची आठवणही या मुलीने ऑडिओ क्लिपमध्ये सांगितली. सध्या पोलीस या प्रकरणाचा तपास करत आहेत. एका हिंदी वेबसाईटने याबाबतचे वृत्त दिले आहे.