शिरूर अनंतपाळ (जि. लातूर) - निलंगा तालुक्यातील वांजरवाडा येथील एकास हात उसणे घेतलेले ५०० रुपये का देत नाहीस, असे म्हणत डोक्यात काठीने मारहाण करण्यात आली. त्यात तो गंभीर जखमी झाला होता. त्यास उपचारासाठी सोलापूरच्या खाजगी दवाखान्यात दाखल करण्यात आले होते. उपचारादरम्यान त्याचा मृत्यू झाला. याप्रकरणी शिरुर अनंतपाळ पोलीस ठाण्याअंतर्गतच्या चौकीत गुरुवारी खुनाचा गुन्हा दाखल करण्यात आला आहे.
ज्योतिराम लालू पवार (३०, रा. वांजरवाडा, ता. निलंगा) असे मयत व्यक्तीचे नाव आहे. पोलिसांनी सांगितले, निलंगा तालुक्यातील वांजरवाडा येथील ज्योतिराम पवार याने गावातील काशीराम हणमंत जाधव याच्याकडून ५०० रूपये हात उसने घेतले होते. उसने घेतलेले हे पैसे का देत नाहीस म्हणून जाधव याने त्याच्या डोक्यात काठीने मारले. त्या तो गंभीर जखमी झाला. दरम्यान, त्यास गावकऱ्यांनी मदत म्हणून वर्गणी जमा करून सोलापुरातील खाजगी दवाखान्यात उपचारासाठी दाखल केेले होते. मात्र, उपचारा दरम्यान त्याचा मृत्यू झाला.
याबाबत कमळाबाई लालू पवार यांंच्या फिर्यादीवरुन आरोपी काशिराम जाधव याच्या विरोधात कलम ३०२, ३०७, ५०४, ५०६ भादविनुसार गुरुवारी गुन्हा दाखल करण्यात आला आहे. दरम्यान, शिरुर अनंतपाळ पोलिसांनी आरोपीचा शोध घेऊन ताब्यात घेतले. अधिक तपास पोउपनि. मल्लया स्वामी हे करीत आहेत.