ठाणे: पूर्ववैमनस्यातून आकाश राजभर (२३, रा. सावरकरनगर, ठाणे) या तरुणावर तलवारीने हल्ला करुन त्याच्या खूनाचा प्रयत्न करणाऱ्या सात अल्पवयीन मुलांना वर्तकनगर पोलिसांनी बुधवारी अटक केली. यातील अन्य दोन आरोपी महिलांचाही शोध घेण्यात येत असल्याची माहिती सूत्रांनी दिली.
सावरकरनगर येथील रहिवाशी राजभर हा २ आॅगस्ट २०२२ रोजी दुपारी २.३० वाजण्याच्या सुमारास वडापाव खाण्यासाठी सावरकरनगर येथील जय महाराष्ट्र वडापाव सेंटर येथे गेले होते. त्याचवेळी कविता राठोड ऊर्फ बंबा आणि तिची आई तसेच इतर सात अल्पवयीन मुलांनी संगनमताने पूर्वी झालेल्या भांडणारचा राग मनात धरुन धरून त्याच्या डोक्यावर तलवारीने वार करून ठार मारण्याचा प्रयत्न केला. या हल्ल्यात गंंभीर जखमी झालेल्या राजभर याला जवळच्याच एका खासगी रुग्णालयात उपचारासाठी दाखल करण्यात आले आहे.
कविता राठोडसह नऊ जणांविरुद्ध याप्रकरणी खूनाचा प्रयत्न केल्याचा गुन्हा वर्तकनगर पोलीस ठाण्यात २ आॅगस्ट रोजी रात्री दाखल करण्यात आला आहे. या प्रकरणाची गांभीर्याने दखल घेत वरिष्ठ पोलीस निरीक्षक सदाशिव निकम यांच्या मार्गदर्शनाखाली पोलीस उपनिरीक्षक रणभिसे यांच्या पथकाने यातील सात कथित अल्पवयीन आरोपींना ३ आॅगस्ट रोजी ताब्यात घेतले. त्यांची भिवंडी येथील बाल सुधारगृहात रवानगी करण्यात आली आहे.