तुझी बायको पांढऱ्या पायाची, तू आमदारही होणार नाहीस; असा 'सल्ला' देणाऱ्या 'गुरू'ला बेड्या

Pune Crime News: प्रतिष्ठीत कुटुंबाला सुनेचा छळ करायला प्रवृत्त केल्याप्रकरणी चतु:श्रृंगी पोलिसांनी आध्यात्मिक गुरु यांना अटक केली आहे.

पुणे - तुझी बायको पांढऱ्या पायाची आहे. तिचे ग्रहमान दुषित झाले आहे. जर तुझी ही बायको म्हणून कायम राहिली तर तू आमदार, मंत्रीही होणार नाही, तिला लवकरात लवकर सोडचिठ्ठी देत, असे सांगून प्रतिष्ठीत कुटुंबाला सुनेचा छळ करायला प्रवृत्त केल्याप्रकरणी चतु:श्रृंगी पोलिसांनी आध्यात्मिक गुरुला अटक केली आहे.

रघुनाथ राजाराम येमुल (वय ४८, रा. धवलगिरी अपार्टमेंट, बाणेर) असे या आध्यात्मिक गुरुचे नाव आहे. रघुनाथ येमुल यांचे शेकडो भक्त असून त्यामुळे पुणे शहर व परिसरात एकच खळबळ उडाली आहे. न्यायालयाने त्यांना एक दिवसाची पोलीस कोठडी मंजूर केली आहे.
याप्रकरणी एका महिलेने चतु:श्रृंगी पोलिसांकडे फिर्याद दिली आहे. त्यात चतु:श्रृंगी पोलिसांनी गणेश ऊर्फ केदार गायकवाड, नानासाहेब गायकवाड, नंदा गायकवाड, सोनाली गवारे, दीपक गवारे, भागीरथी पाटील, राजू अंकुश अशा ८ जणांवर यापूर्वीच गुन्हा दाखल करण्यात आला होता. या गुन्ह्यांचा तपास करीत असताना हा प्रकार समोर आला आहे.

फिर्यादी या डिसेंबर २०१९ मध्ये रात्री आपल्या बाळासह बेडरुममध्ये झोपल्या असताना त्यांना कुजबुजण्याचा आवाज आला. त्यांनी बाहेर येऊन पाहिले असता तेथे सोनाली व दीपक गवारे हे बेडरुमच्या बाहेर हळदी कुंकु लावलेल्या टचण्या मारलेल्या लिंबु एका पिशवीमध्ये ठेवताना त्यांना दिसले. त्यांनी हा प्रकार आपले पती गणेश यांना सांगितला. त्यानंतर गणेश याने फिर्यादी यांना सांगितले की, रघुनाथ येमुल हे माझे गुरु आहेत. व त्यांनी तू अवदसा असून, पांढर्या पायगुणाची आहे. तिची जन्मवेळ चुकीची आहे. त्यामुळे सर्व ग्रहमान दुषित झाले आहेत. जर तुझी ही बायको म्हणून अशीच कायम राहिली तर तू आमदार ही होणार नाही व मंत्रीही होणार नाहीस. त्यामुळे तिला लवकरात लवकर सोडचिठ्ठी दे आणि तुझा मुलगाही तिच्याकडून काढून घे. तसेच मी देतो हे लिंबू उतरविल्याने तुझ्या मागची ही पिडा कायमची निघून जाईल. त्यामुळे गणेशने येमुल यांनी दिलेले लिंबु फिर्यादीवरुन उतरवून टाकले. याची माहिती मिळाल्यावर चतु:श्रृंगी पोलिसांनी रघुनाथ येमुल यांना अटक केली.