मीरारोड - मी पोलीस असून , तुम्ही गांजा पिता म्हणून पोलीस चौकीत चला असे धमकावणाऱ्या भामट्यास भाईंदरच्या नवघर पोलिसांनी अटक केली असून त्याच्याकडून दुचाकी, रोख व ४ मोबाईल असा मुद्देमाल जप्त करण्यात आला आहे. कमल मंडल व राजकुमार मनिक हे दोघे मित्र नाश्टा करण्यासाठी सायंकाळी भाईंदर फाटक पूर्व येथे पायी चालत जात होते . त्यावेळी अचानक दुचाकीवरून आलेल्या एका इसमाने आपण पोलीस असून तुम्ही बंगाली आहेत का ? अशी विचारणा केली . पोलीस बंगाली लोकांना पकडते, तुम्ही गांजा पिता असे सांगून चौकीत चला असे धमकावले व त्यांच्या कडील २ मोबाईल आणि ७ हजार रोख लुटून पळून गेला.
नवघर पोलीस ठाण्याचे वरिष्ठ पोलीस निरीक्षक मिलिंद देसाई यांच्या मार्गदर्शनाखाली गुन्हे प्रकटी करण पथकातील निरीक्षक प्रकाश मासाळ, सहायक निरीक्षक योगेश काळे, उपनिरीक्षक संदिप ओहोळ व संतोष धावडे सह भुषण पाटील, गणेश जावळे, संदिप जाधव, सुरज घुनावत, विनोद जाधव यांनी गुन्ह्याचा तपास सुरु केला . गुन्हयाच्या घटनास्थळ व आजुबाजुच्या परिसरातील सीसीटिव्ही कॅमेरे यांची पडताळणी करुन सदरचा गुन्हा करणार-या अनोळखी आरोपीने परिधान केलेले कपडे व गुन्हयात वापरलेली दुचाकीची माहिती पोलिसांनी गोळा केली . त्या अनुषंगाने पोलिसांनी तोतया पोलीस अल्ताफ हाशमी (२९) ह्याला अटक केली आहे . त्याच्या कडून ३९ हजारांचा मुद्देमाल जप्त केला असल्याची माहिती गुरुवारी पोलिसां कडून देण्यात आली.