उत्तर प्रदेशातील देवरिया पोलिसांच्या सतर्कतेमुळे एका युवकाचा जीव वाचला आहे. अवघ्या १२ मिनिटांनी पोलिसांनी या तरुणाला फासावरून खाली उतरवले. या युवकाच्या वडिलांनी कर्ज घेतले होते. घरची परिस्थिती बिकट होती. बँकेकडून सातत्याने कर्ज फेड करण्यासाठी फोन करून छळले जायचे. बापासाठी काहीच करता येत नाही या नैराश्येत युवकाने गळफास घेण्याचा निर्णय घेतला. मात्र आत्महत्येपूर्वी त्याने इन्स्टाग्रामवर पोस्ट टाकली.
विशेष म्हणजे युवकाच्या मित्रांच्या अगोदर मेटाने ही स्टोरी पाहिली आणि तात्काळ पोलिसांना सूचित केले. सूचना मिळताच १२ मिनिटांच्या आत पोलिस घटनास्थळी दाखल झाले आणि युवकाचा जीव वाचवला. पचौहा गावातील युवकाने त्याच्या इन्स्टाग्रामवर 'भाई लोग माफ करना, आज मै मरने जा रहा हू' अशी पोस्ट टाकली. मेटाने याची दखल घेत तातडीने लखनौच्या पोलीस मुख्यालयाला सूचित केले. त्यानंतर पोलीस महासंचालक राजीव कृष्णा यांच्या निर्देशाने १२ मिनिटांत पोलिस युवकाच्या घरी पोहचली. घटनास्थळी पोहचलेल्या पोलिसांनी गळफास घेत असलेल्या युवकाच्या गळ्यातून फास काढून त्याला खाली उतरवले.
कर्जबाजारीपणामुळे आयुष्याला कंटाळला
१२ जून रोजी ही घटना घडली. एक १९ वर्षीय युवक गळफास घेऊन आत्महत्येच्या तयारीत होता. त्याने गळ्यातील फाशीचा फोटो क्लिक करून इन्स्टाग्रामवर शेअर केला होता. त्यासोबतच भाई लोग माफ करना, आज मै मरने जा रहा हू असा मेसेज लिहिला. त्यानंतर त्याची ही स्टोरी मित्रांनी पाहायच्या आधीच मेटा कंपनीने पाहिली. दुपारी ३.४४ वाजता मेटा कंपनीकडून लखनौ पोलिस मुख्यालयाला संबंधित प्रकार कळवला. त्यानंतर पोलीस महासंचालकांनी तातडीने सूत्रे हलवून पोलिसांनी अलर्ट केले.
मेटा कंपनीकडून पाठवलेला अलर्ट आणि मोबाईल नंबरवरून युवकाचे लोकेशन ट्रेस करण्यात आले. लोकेशन मिळताच भलुअनी उपनिरिक्षक १२ मिनिटांत युवकाच्या घरी पोहचले. तिथे घरच्यांकडून युवकाची माहिती घेतली. युवक त्याच्या खोलीत गळफास घेण्याचा प्रयत्न करत होता. तेव्हा तात्काळ पोलिसांनी खोलीत जात त्याला फासावरून खाली उतरवले. हा युवक बीएच्या दुसऱ्या वर्षाला शिकत आहे. आई वडिलांनी घेतलेले कर्ज, ते आपण फेडू शकत नसल्याची खंत युवकाला होती. त्यामुळेच त्याने आत्महत्येसारखे टोकाचे पाऊल उचलण्याचा प्रयत्न केला असं तपासात पुढे आले.