सदानंद नाईक -
उल्हासनगर: शहरातील कल्याण-अंबरनाथ रस्त्यावरून आई-वडीलांसोबत जाणाऱ्या ८ वर्षाच्या कायरा या मुलीच्या डोक्यावरून ट्रक गेल्याने, तीचा जागीच मृत्यू झाला. हा प्रकार शनिवारी रात्री ८ वाजच्या सुमारास घडला. पोलिसांनी ट्रक चालक विशाल यादववर गुन्हा दाखल करून त्याला अटक केली आहे.
उल्हासनगरातील कल्याण ते अंबरनाथ रस्त्यावरून शनिवारी रात्री ८ वाजता भुपेश नारवानी मुलगी कायरा व पत्नी सोबत मोटरसायकल वरून जात होते. त्यावेळी पाठीमागून भरधाव आलेल्या ट्रकने मोटरसायकलला जोरदार धडक दिली. या अपघातात ८ वर्षाच्या कायरा हिच्या डोक्यावरून ट्रकचे चाक गेल्याने, तीचा जागीच मृत्यू झाला. तर नारवानी यांची पत्नी जखमी झाली. स्थानिक नागरिकांनी सदर अपघाताची माहिती मध्यवर्ती पोलिसांना देऊन ट्रक चालक विशाल फुलचंद यादव याला पोलिसांच्या ताब्यात दिले. मध्यवर्ती पोलिसांनी ट्रक चालक विशाल यादव यांच्यावर गुन्हा दाखल करून अटक केली.
या अपघातात ८ वर्षाच्या कायरा हिचा मृत्यू झाल्याने, सर्वत्र हळहळ व्यक्त होत आहे. अधिक तपास वरिष्ठ पोलीस निरीक्षक मधुकर कड यांच्या मार्गदर्शनाखाली होत आहे.