केजमध्ये राबविली जातेय शून्य कचरा क्षेत्र मोहीम

केज : येथील नगर पंचायतीच्या हद्दीतील रस्ते शून्य कचरा क्षेत्र म्हणून ओळखण्याकरिता मुख्याधिकारी रामदास कोकरे यांनी शून्य कचरा क्षेत्र मोहीम हाती घेतली आहे. या मोहिमेला पहाटे पाच वाजल्यापासून सुरुवात होत असल्याने ठिकठिकाणचा कचरा साफ केला जात आहे.
शून्य कचरा झोन साठी राज्य महामार्गावरील प्रतिभा नर्सिंग होम ते जयभवानी चौक आणि जयभवानी चौक ते जयभवानी मंदिर या मुख्य रस्त्याची निवड करण्यात आली आहे. या रस्त्यावर कोणत्याही प्रकारचा कचरा शिल्लक राहणार नाही, याची कडेकोट दक्षता नगर परिषद मजूर घेत आहेत. या मोहिमेसाठी मुख्याधिकारी कोकरे यांनी कामाचे नियोजन करुन कर्मचाऱ्यांना सूचना दिल्या आहेत. त्यानुसार पहाटे पाच वाजल्यापासून कामाला सुरुवात केली जात आहे. त्यामुळे हे काम लवकरच संपेल, अशी अपेक्षा व्यक्त होत आहे.
चार दिवसानंतर ही मोहीम केज शहरातील प्रत्येक गल्लीमध्ये राबविण्यात येणार आहे. त्यासाठी तीन अ‍ॅपे, दोन ट्रक आदी वाहनांचा समावेश आहे.
तीन वाहने खरेदी करण्यात आली असून ही वाहने उपलब्ध होताच मोहिमेला वेग मिळणार आहे. सध्या सुरु असलेल्या मोहिमेत १६ कर्मचारी व मजूर यांचा समावेश आहे.
मुख्याधिकारी कोकरे हे स्वत: तेथे थांबत असल्याने काम योग्य पध्दतीने सुरु आहे. या मोहिम दोन प्रकारे राबविण्यात येत आहे. यात ओला कचरा व सुका कचरा असे वर्गीकरण करण्यात येत आहे.
कचरा गोळा करण्यासाठी प्रत्येक गल्लीत घंटागाडी चालविली जात आहे. नागरिकांनी कचरा उघड्यावर टाकू नये, हा कचरा कचराकुंडीतच टाकावा, असे आवाहन नगराध्यक्षा श्रीमती शितल दांगट, मुख्याधिकारी कोकरे यांनी केले आहे.
कचरा डेपोची जागा बदलली
राज्य महामार्गावरुन केज शहरात बीडहून कचरा डेपोनेच स्वागत होते. शिवाय या परिसरात औद्योगिक प्रशिक्षण संस्था, दोन शाळा आणि एक तंत्रनिकेतन महाविद्यालय असल्याने या कचरा डेपोचा त्रास विद्यार्थ्यांना होतो. त्यामुळे विद्यार्थ्यांच्या आरोग्याचा प्रश्नही निर्माण झाला आहे. विद्यार्थ्यांच्या आरोग्या प्रश्न लक्षात घेता हा डेपो बीड राज्य महामार्गाशेजारी गायरान जमिनीवरील खड्ड्यामध्ये सदिनकाच्या जागेत हलविण्यात आला आहे. (वार्ताहर)