बाभुळगाव ग्रामपंचायत निवडणुकीवर केंद्रीय राज्यमंत्र्याचे लक्ष

बनकिन्होळा : सिल्लोड तालुक्यातील बाभुळगाव (बु.) येथील ग्रामपंचायत निवडणुकीत प्रचाराला जाेर मिळाला आहे. आपलेच पॅनेल जिंकून येईल, यासाठी गावपुढारी आटापिटा करीत आहेत. केंद्रीय राज्यमंत्री रावसाहेब दानवे यांची भाची तथा विद्यमान सरपंच या निवडणुकीत पुन्हा नशीब अजमावत आहेत. त्यांना टक्कर देण्यासाठी शिवसेेनेदेखील युवा कार्यकर्ता रिंगणात उतरविला आहे. या लढतीने संपूर्ण तालुक्याचे लक्ष बाभुळगावच्या निवडणुकीकडे लागून आहे.

बाभुळगाव (बु.) ग्रामपंचायत ही सात सदस्यांची ग्रामपंचायत आहे. तर गावची लोकसंख्या अकराशे आहे. लक्ष्मीमाता ग्रामविकास पॅनेल विरुद्ध जय बजरंग दल ग्रामविकास पॅनेल यांच्यात चुरशीची लढत सुरू आहे. सात जागांसाठी एकूण १३ उमेदवार निवडणुकीच्या रिंगणात उतरले आहेत. एक महिला उमेदवार बिनविरोध निवडून आली आहे. दोन्ही पॅनेलकडून विद्यमान सरपंच, उपसरपंच यांच्यासह तीन विद्यमान सदस्य, तर एका विद्यमान सदस्याच्या सौभाग्यवती व एका विद्यमान सदस्याची सून पुन्हा निव़डणुकीच्या रिंगणात आमने-सामने आले आहेत. विरोधी पॅनेलच्या उमेदवारांशी बोलणे बंद करणे, एकमेकांबद्दल कटुता निर्माण केली जात आहे. मात्र, बाभुळगाव (बु) हे गाव त्यापासून अलिप्त आहे. अत्यंत खेळीमेळीच्या वातावरणात निवडणुकीचा प्रचार केला जात आहे. त्यात तिन्ही वाॅर्डमध्ये ६०८ मतदान असल्यामुळे ‘डोअर टू डोअर’ प्रचार सुरू असून नाराज असलेल्या मतदारांना राजी केले जात आहे.

---

केंद्रीय राज्यमंत्री दानवे यांची भाची रिंगणात

बाभुळगाव ग्रामपंचायतीतील वाॅर्ड क्रमांक तीनमध्ये सर्वसाधारण जागेवर शिवसेना शाखाप्रमुख प्रभाकर काशिनाथ वाहटुळे यांच्याविरोधात केंद्रीय राज्यमंत्री रावसाहेब दानवे यांची भाची व विद्यमान सरपंच कौशल्याबाई काकासाहेब फरकाडे या उभ्या आहेत. त्यामुळे जनशक्ती विरुद्ध धनशक्ती अशी अस्तित्वाची लढाई म्हणून या लढतीकडे पाहिले जात आहे. संपूर्ण तालुक्याचे याकडे लक्ष लागून आहे. एकाअर्थाने शिवसेना विरुद्ध भाजप असा सामना येथे दिसून येत आहे, तर केंद्रीय राज्यमंत्री दानवे यांचे देखील या निवडणुकीवर लक्ष आहे.

-------

चौकट :

वाॅर्ड क्रमांक एक : १७७, वाॅर्ड क्रमांक दोन : २६६, तर वॉर्ड क्रमांक तीनमध्ये १६५ मतदान असून संपूर्ण गावात एकूण ६०८ असे मतदान आहे.