अपघातात जखमी दुचाकीस्वाराचा मृत्यू

गणेश देशमुख हे रविवारी (दि. २०) दुचाकी (एम.एच. २०, डी.वाय. १९१७)ने ए.एस. क्लबमार्गे कमळापूरकडे चालले होते. तनवाणी शाळेजवळ दुचाकी घसरून ते गंभीर जखमी झाले. शासकीय रुग्णालयात उपचारादरम्यान त्यांची प्राणज्योत मालवली. या प्रकरणी एमआयडीसी वाळूज पोलीस ठाण्यात आकस्मिक मृत्यूची नोंद करण्यात आली.

-------------------------

वडगावात ३१ दिव्यांगांना लसीकरण

वाळूज महानगर : वडगाव कोल्हाटी येथील जिल्हा परिषद शाळेत बुधवारी (दि. २३) आरोग्य विभागाच्या वतीने ३१ दिव्यांगांना कोविडची लस देण्यात आली. याप्रसंगी दौलताबाद प्राथमिक आरोग्य केंद्राचे वैद्यकीय अधिकारी डॉ. संग्राम बामणे, आरोग्यसेविका मीनल कांबळे, सय्यद, प्रहारचे जिल्हा संपर्क प्रमुख पारसचंद साकला, जिल्हा सचिव जोतिराम जाधव, पश्चिम तालुकाध्यक्ष बदरीनाथ लघाणे, गजानन खांडगे, आदींची उपस्थिती होती.

------------------------------

बजाजनगरातील अतिक्रमण हटविले

वाळूज महानगर : बजाजनगरातील महाराणा प्रताप चौकात विविध व्यावसायिकांनी केलेली अतिक्रमणे बुधवारी (दि. २३) एमआयडीसीने हटविली. या चौकात विविध व्यावसायिकांनी रस्त्यालगतच्या जागेवर अतिक्रमणे केली होती. एमआयडीसीचे उपअभियंता बी. एस. दीपके यांनी या चौकातील रहदारीस अडथळा ठरणारी अतिक्रमणे हटवून रस्ता मोकळा केला.

-------------------------

वाळूज महानगरात रिमझिम पाऊस

वाळूज महानगर : वाळूज महानगर परिसरात बुधवारी (दि. २३) सायंकाळी ६ वाजेच्या सुमारास रिमझिम पावसाला सुरुवात झाली. गत १५ दिवसांपासून पावसाने दडी मारल्याने या परिसरातील शेतकऱ्यांत चिंतेचे वातावरण पसरले आहे. बुधवारी दिवसभर या परिसरात ढगाळ वातावरण होते.

---------------------------

जोगेश्वरीत प्रवेशद्वाराजवळ खड्डे

वाळूज महानगर : जोगेश्वरी ग्रामपंचायतीने उभारलेल्या प्रवेशद्वारासमोर खड्डे पडल्याने वाहनधारकांना त्रास सहन करावा लागत आहे. या प्रवेशद्वाराजवळच सदोष गतिरोधकही उभारण्यात आला आहे. खड्डे व गतिरोधकामुळे ये-जा करणाऱ्या दुचाकीस्वार व चारचाकी वाहनधारकांना कसरत करीतच ये-जा करावी लागत आहे. रात्रीच्या वेळी खड्ड्यात आदळून दुचाकीस्वार जखमी होत असल्याच्या घटनाही वाढल्या आहेत.

-----------------------