औरंगाबाद : नातीसह दुचाकीने जाणाऱ्या दाम्पत्याला भरधाव ट्रकने उडवले. या अपघातात दुचाकीस्वार महिला ट्रकच्या चाकाखाली आल्याने आॅन दी स्पॉट ठार झाली. तर त्यांचा पती आणि नात यांना या अपघातात किरकोळ मार लागला. हा भीषण अपघात शनिवारी दुपारी दिड ते पावणे दोन वाजेच्या सुमारास बीडबायपास रोडवरील गोदावरी टी पॉर्इंटजवळ घडला.
प्रयागबाई बाजीराव राठोड(४५,रा.गाडीवाट)असे मृत महिलेचे नाव आहे. या अपघातात त्यांचा पती बाजीराव सिताराम राठोड(५५) आणि नात सुप्रिया सुनील राठोड(३)हे जखमी झाले. या अपघाताविषयी सातारा पोलिसांनी दिलेली माहिती अशी की, राठोड दाम्पत्य हे बीडबायपास परिसरातील भारतमातानगर येथे नातेवाईकांकडे आले होते.राठोड यांचा मुलगा नितेश हा गिरनेर तांडा येथे विहिर खोदण्याचे काम करीत आहे. त्याला भेटण्यासाठी राठोड दाम्पत्य चिमुकल्या नातीसह शनिवारी दुपारी दिड वाजेच्या सुमारास मोटारसायकलने गिरनेर तांडा येथे जाऊ लागले. बायपासवरील गोदावरी टी पॉर्इंटजवळ ते असताना मागून वेगाने आलेल्या ट्रकने त्यांना धडक दिली.
या अपघातात दुचाकीवर मागे बसलेल्या प्रयागबाई रोडवर पडल्याने आणि ट्रकच्या मागील चाकाखाली आल्या. तर बाजीराव आणि सुप्रिया हे रस्त्याच्या डाव्या बाजूला फेकल्या गेल्याने त्यांना किरकोळ मार लागला. या भीषण अपघातात प्रयागबाई या घटनास्थळीच ठार झाल्या.अपघाताची माहिती मिळताच सातारा ठाण्याचे निरीक्षक भारत काकडे आणि कर्मचाऱ्यांनी घटनास्थळी धाव घेऊन पंचनामा केला. याप्रकरणी अपघाताचा गुन्हा नोंद करून पोलिसांनी ट्रकचालकास ताब्यात घेतल्याची माहिती पोलीस निरीक्षक काकडे यांनी दिली.