- मेहमूद शेख
वाळूजमहानगर: भरधाव दोन दुचाकींच्या धडकेत दोघांचा मृत्यू झाल्याची घटना शुक्रवारी रात्री बजाजनगरात घडली. या अपघातात अन्य एकजण गंभीर जखमी झाला. संजय रामदास बोरुडे (२५, रा.रांजणगाव) असे एका मृताचे नाव असून दुसऱ्या मृताची ओळख पटली नाही.
प्रत्यक्षदर्शीने दिलेल्या माहितीनुसार, संजय रामदास बोरुडे (२५,रा.दत्तनगर, रांजणगाव) व त्याचा मित्र कल्याण प्रभाकर मानकापे हे दोघे शुक्रवारी रात्री ११ वाजेच्या सुमारास दुचाकीवर (क्रमांक एम.एच.२०,जी.जे.६०२५) बजाजनगरातून भरधाव वेगाने उद्योग नगरीत चालले होते. दरम्यान, महाराणा प्रताप चौकात विरुद्ध दिशेने एक दुचाकी (क्रमांक एम.एच.२०, ए.एम.९११७) वेगाने येत होती. दोन्ही दुचाकींची समोरासमोर भीषण धडक झाली. यात दोन्ही दुचाकीवरील तिघेही गंभीर जखमी झाले होते.
माहिती मिळताच सामाजिक कार्यकर्ते मनोज जैन यांनी नागरिक व पोलिसांच्या मदतीने तिन्ही गंभीर जखमींना उपचारासाठी शासकीय रुग्णालयात दाखल केले. उपचारादरम्यान संजय बोरुडे व अन्य दुचाकीवरील अनोळखी तरुणाचा मृत्यू झाला. तर कल्याण मानकापे याच्यावर उपचार सुरू आहेत. या अपघाताची एमआयडीसी वाळूज पोलीस ठाण्यात नोंद घेण्यात आली आहे.