कन्नड (औरंगाबाद ) : हिंदुस्थान पेट्रोलियमचे टॅंकर आणि दुचाकी यांच्यात जोरदार धडक होऊन झालेल्या अपघातात एकजण जागीच ठार झाला तर एक गंभीर जखमी आहे. हा अपघात कन्नड -औरंगाबाद रस्त्यावरील बहिरगाव फाट्यावर गुरुवारी (दि. २७ ) दुपारी एक ते सव्वा वाजेदरम्यान घडला.
कृष्णा साहेबराव घुगे ( ४० )रा. देवपुळ ह. मु.वडगाव कोल्हाटी हे मुलगा आदित्य कृष्णा घुगे ( १२ ) याच्यासह मोटारसायकल ( क्र. एमएच २० सीव्ही ४२२७ ) ने कन्नड हून औरंगाबादकडे जात होते. त्याच वेळी हिंदुस्थान पेट्रोलियमचा डिझेल टँकर ( क्र. एमएच ०४ जीसी ५८२० ) औरंगाबाद कडून कन्नडकडे जात होता. विरूध्द दिशेने धावणाऱ्या दोन्ही वाहनांची बहिरगाव फाट्यावर समोरासमोर जोरदार धडक झाली. या अपघातात कृष्णा घुगे हे जागीच ठार झाले तर त्यांचा मुलगा आदित्य ( १२ ) गंभीर जखमी झाला. त्याच्यावर कन्नड येथील ग्रामीण रुग्णालयात प्राथमिक उपचार करून पुढील उपचारासाठी घाटी रुग्णालयात रवाना करण्यात आले.