छत्रपती संभाजीनगर : उद्योजक संतोष लड्डा यांच्या घरात कोट्यवधींची रोख रक्कम ठेवलेली असते, अशी माहिती सूत्रधार याेगेश सुभाष हाजबे (३१, रा. वडगाव कोल्हाटी) याला एका व्यक्तीने सांगितली होती. न्यायालयातही पोलिसांनी ही बाब निदर्शनास आणून दिली. त्यानंतर त्याने अमोल खोतकरसोबत मिळून दरोड्याचा कट रचला. मात्र, चार दिवसांपासून योगेश पोलिसांच्या ताब्यात असतानाही माहिती पुरवून दरोडा घडवून आणणाऱ्या ‘त्या’ व्यक्तीचा उलगडा झाला नसल्याने आश्चर्य व्यक्त केले जात आहे.
१५ मेच्या मध्यरात्रीच्या दरोड्यानंतर गुन्हे शाखा, एमआयडीसी वाळूजचे नऊ अधिकारी, ४० कर्मचारी ११ दिवस सातत्याने तपास करत होते. ५५ सीसीटीव्ही फुटेजनंतर पोलिस योगेशपर्यंत पोहोचले आणि दरोडेखोरांची ओळख पटत गेली. रविवारी अमोल वगळता अन्य आरोपी ताब्यात असतानाच अमाेलच्या एन्काउंटरमुळे कोट्यवधींच्या सोन्याचे गूढ कायम राहिले. प्राथमिक तपासात पोलिस केवळ २० तोळे सोने जप्त करू शकले होते. बुधवारी हाजबेकडून आणखी १३ तोळे साेने जप्त केले. मात्र, ते कुठून जप्त केले, हे सांगण्यास अधिकाऱ्यांनी नकार दिला.
घटनेनंतर दीड तास अमाेल घरी१५ मे रोजी दरोड्यानंतर चार वाजता दरोडेखोर साजापूरच्या लॉजवर परतले. त्यानंतर सकाळी सहा वाजता अमोल घरी गेला. जवळपास एक दीड तास घरात थांबून आठ वाजता तो मैत्रीण हाफिजा ऊर्फ खुशी अक्तर अली शेख (२७, मूळ रा. प. बंगाल) हिच्यासोबत चेन्नईच्या दिशेने रवाना झाला. तेथून काही दिवस तामिळनाडू, मध्य प्रदेशमध्ये थांबून त्याने मालेगाव, नाशिक, शिर्डीत मुक्काम ठोकून रविवारी शहर गाठले. त्यानंतरही २४ तास तो शहरात फिरत होता.
पूर्ण वाटप झालेच नव्हते ?दरोड्याआधी अमोल वगळता इतरांनी यथेच्छ दारू रिचवली. दरोड्यात आपल्या हाती ५.५ किलो सोने व ३२ चांदी लागल्याची जाणीवही त्यांना नव्हती. दागिन्यांचे पूर्ण वाटपही झाले नव्हते. आरोपींच्या दाव्यानुसार पहिल्या दिवशी प्रत्येकी अंदाजे २०० ग्रॅमपर्यंत सोन्याचे वाटप झाले. त्यामुळे उर्वरित सर्व सोने अमोलने स्वत:च्या जवळच्या व्यक्तीकडे ठेवल्याचा दाट संशय पोलिसांना आहे. त्या अनुषंगाने तपास होत आहे.
अमोलवर २४ तासांत दुसरा गुन्हाएन्काउंटर प्रकरणात गुन्ह्यासह अमोलवर २४ तासांत दौलताबाद पोलिस ठाण्यात दुसरा गुन्हा दाखल करण्यात आला. त्यात टोलनाक्याच्या कर्मचाऱ्याला फिर्यादी करण्यात आले. अमाेलने २५ मे रोजीदेखील एकाच्या अंगावर गाडी घातली होती. या संदर्भात ‘लोकमत’ने वृत्त प्रकाशित केले होते. रात्री ११ वाजता माळीवाड्याच्या समृद्धी टोल प्लाझा क्र. १७ येथे लेन ६ वर अमोल कारने (एमएच १५ सीवाय-०५५०) बूम तोडून पसार झाला होता. यात टोल कर्मचारी किशोर ठाले हे बालंबाल वाचले. त्याने पाेलिसांना हूल देऊन पोबारा केला होता. त्याच्यावर ठाले यांच्या तक्रारीवरून बीएनएस ११० (सदोष मनुष्यवधाचा प्रयत्न), ३२४ (१) अंतर्गत दौलताबाद ठाण्यात गुन्हा दाखल करण्यात आला.