छत्रपती संभाजीनगर : समृद्धी महामार्गावरून जाणाऱ्यांच्या सुरक्षेचा प्रश्न पुन्हा ऐरणीवर आला आहे. रात्रीच्या वेळी प्रवास करणाऱ्या एका वाहनावर अज्ञातांनी दगडफेक केल्याचे एका सोशल मीडिया प्लॅटफॉर्मवर व्हिडिओ व्हायरल झाले आहेत. छत्रपती संभाजीनगर ते नागपूर दरम्यान असलेल्या बोगद्यांमध्ये हा प्रकार होत असल्याचे व्हायरल व्हिडिओतून दिसते. वाहन थांबवून लुटीसाठी दगडफेक करण्याची ‘मोडस ऑपरेंडी’ आहे. महामार्गावरील सुरक्षेच्या उपाययोजनांवर प्रश्नचिन्ह असून मार्गावर रात्री पोलिस गस्त व इमर्जन्सी सेवा वाढविण्याची गरज आहे.
सोशल मीडियातील व्हिडीओ नेमक्या कोणत्या तारखेचा आहे, हे समजत नाही. परंतु रविवारी व्हिडीओ अपलोड केल्यानंतर तो सोमवारी व्हायरल झाला. रात्रीच्या सुमारास ही घटना घडली आहे. एका खासगी वाहनावर अज्ञात व्यक्तींनी दगडफेक करून वाहन थांबवण्याचा प्रयत्न केला. चालकाने प्रसंगावधान राखत वाहन न थांबवता पुढे घेतल्याने अनर्थ टळला.
कुठे हाेत आहेत घटना?छत्रपती संभाजीनगर तालुक्यातील ३५ गावे, गंगापूर ११ गावे, वैजापूरमधील १५ गावांतील तर जालना जिल्ह्यातील २५ गावांत १६०० कोटींतून भूसंपादन केले. मार्गावर ४ हजार कोटींचा खर्च जिल्ह्यात झाला आहे. १६ पॅकेजेसपैकी ८, ९ आणि १० हे तीन पॅकेज छत्रपती संभाजीनगर व जालन्यातील आहेत. हर्सूल-सावंगी, लासूर स्टेशन, माळीवाडा, वैजापूर येथे इंटरचेंज व बोगद्याच्या मधोमध लुटमारीच्या घटना होत आहेत.
समृद्धीवर मागील दोन वर्षातील लुटमारीच्या घटना- समृद्धीवरून जाताना छत्रपती संभाजीनगरलगत एका कुटुंबाचे वाहन अडवून सोने व इतर साहित्य लुटून मारहाण- वैजापूर, जांबरगाव शिवारात रात्री दोन प्रवाशांच्या वाहनावर दगडफेक; त्यात एक जण जखमी- नागपूर ते मुंबई मार्गावरील करजना गावाजवळ मध्यरात्री ट्रॅव्हल बसवर दगडफेक- मेहकरजवळ एका कुटुंबाला अडवून रोख रक्कम व इतर साहित्य लुटले.- मेहकरजवळ मुंबईकडे जात असलेल्या कुटुंबास लुटले
सुरक्षा पथकाची गस्तप्रत्येक पॅकेजमध्ये कंत्राटदाराचे एक वाहन ४ तासांसाठी आहे. हायवे सुरक्षा पथकाची गस्त असते. महाराष्ट्र सुरक्षा फोर्सचे १० जणांचे पथक पॅकेजनिहाय आहे. रुग्णवाहिन्या, क्विक रिस्पॉन्स व्हेईकल (क्युआरव्ही) आहेत. लुटमारीचा प्रकार घडल्यास हायवे सेक्युरिटी पोलिसांना त्यांनी लोकल पोलिसांकडे तक्रार देणे गरजेचे आहे, असे एमएसआरडीसी सूत्रांनी सांगितले.