जागा हडपण्याचा डाव

औरंगाबाद : क्रांतीचौक येथील नगर भूमापक क्रमांक १७३३५ या मिळकतीवर २००२ च्या सुधारित विकास आराखड्यानुसार तीन प्रकारचे आरक्षण टाकण्यात आले आहे. ते आरक्षण उठविण्याच्या हालचाली पालिकेने ११ नोव्हेंबरच्या सभेत ऐनवेळी प्रस्ताव घुसवून पूर्ण करून घेतल्या. अब्जावधी रुपये किमतीच्या त्या जागेवरील आरक्षण उठविण्याचा डाव पालिकेने कशासाठी घातला हा प्रश्न आहे.
ठरावाचा कारणापुरता उतारा काढण्यात आला असून, तो संबंधित जागा मालक व प्रशासनाकडे गेल्याचे वृत्त आहे.
सामाजिक उपयोगाच्या जागेवरील आरक्षण उठविण्याच्या प्रकाराला कोर्टाने चाप बसविलेला असताना कोर्ट आदेशाच्या अधीन राहून प्रस्ताव मंजूर करण्यात आला आहे. नगरसेवक सूर्यकांत जायभाये हे सूचक तर सभापती विजय वाघचौरे, अशोक बेहडे हे प्रस्तावाचे अनुमोदक आहेत. महापौर कला ओझा यांनी नियमाने कार्यवाही करावी, असे आदेश देऊन विषयाला मंजुरी दिली आहे. या ठरावाचे इतिवृत्त २० डिसेंबर रोजी होणाऱ्या सर्वसाधारण सभेसमोर आहे. यावरून सत्ताधारी आणि विरोधकांमध्ये जोरदार खडाजंगी होण्याची शक्यता नाकारता येत नाही.
सदरील जागेवर तीन प्रकारचे आरक्षण आहे. आरक्षण क्र.३१० हे शॉपिंग सेंटरचे आहे. आरक्षण क्र.३१० ए पार्किंगसाठी तर आरक्षण क्र.३११ उद्यानासाठी टाकण्यात आले आहे. जागा मालकाने पालिकेकडे मोबदल्यासाठी अर्ज केल्याचा उल्लेख इतिवृत्तामध्ये नाही. भूसंपादन करण्यासाठी पत्रव्यवहार केल्याचाही त्यात उल्लेख नाही, असे असताना संबंधित जागा मालकासाठी तो ठराव मंजूर करण्याच्या हालचाली सत्ताधाऱ्यांनी कशासाठी सुरू केल्या आहेत. त्या आरक्षणात फेरबदल केल्यास शहराच्या विकासात भर पडेल, असे ठरावात म्हटले आहे. गेल्यावर्षी नगररचना विभागाने कांचनवाडी, नक्षत्रवाडी येथील ५५ एकर जागेवरील आरक्षण उठविण्याचा प्रस्ताव सभेत आणला होता.