सोयगाव न. प. मतदार यादीच्या कार्यक्रमाला मुदतवाढ

सोयगाव : सोयगाव नगर पंचायतीच्या निवडणुकांसाठी १ मार्च रोजी होणाऱ्या अंतिम मतदार यादी प्रसिद्धीला अखेरीस निवडणूक विभागाने मुदतवाढ दिली आहे. १५ मार्चला अंतिम मतदार यादी प्रसिद्ध होणार आहे, तर ३१ मार्चला केंद्रनिहाय मतदान याद्या प्रसिद्धी करण्यात येतील, असे आदेश शासनाकडून आले आहेत. त्यामुळे मतदार याद्यांच्या प्रसिद्धीसाठी मुदतवाढ मिळाल्याने नगर पंचायतीच्या निवडणुकाही लांबणीवर गेल्याचे संकेत मिळाले आहेत.

जूनच्या पहिल्या आठवड्यात नगर पंचायतीच्या निवडणुकांचा बिगुल वाजण्याची शक्यता वर्तविण्यात येत आहे.

सोयगाव नगर पंचायतीच्या निवडणुकीसाठी प्रारूप मतदार याद्यांचा कार्यक्रम घोषित करण्यात आला होता. हा कार्यक्रम अंतिम टप्प्यात असताना कोरोना संसर्गामुळे या अंतिम मतदार यादीला मुदतवाढ देण्यात आली आहे. त्यामुळे सोयगाव नगर पंचायतीचा बिगुल लांबणीवर गेला आहे. राज्य निवडणूक आयोगाने दिलेल्या पत्रात नमूद केले आहे की, नगर पंचायतीच्या प्रारूप मतदार यादीच्या कार्यक्रमात हरकती व सूचना प्राप्त झाल्या आहेत. मात्र, सध्या राज्यात कोविडचा वाढता संसर्ग पाहता हे काम लांबणीवर टाकण्याचे सांगण्यात आले आहे.