छत्रपती संभाजीनगरमधून एक धक्कादायक बातमी समोर आली आहे. शिवसेनेचे खासदार संदीपान भुमरे यांच्या कारचालकाच्या नावावर १५० कोटी रुपयांची जमीन नोंदणीकृत झाली आहे. ती 'बक्षिसपत्र' म्हणून नोंदणीकृत झाली आहे, यामुळे आता राजकीय वर्तुळात चर्चा सुरू आहेत. खासदाराच्या ड्रायव्हरला इतक्या मोठ्या रकमेची जमीन त्याच्या नावावर का नोंदणीकृत झाली असेल? ड्रायव्हरचे नशीब एका रात्रीत बदलल्याच्या या प्रकरणामुळे राजकीय वर्तुळातही चर्चा सुरू झाली आहे.
नोंदणीकृत झालेली जमीन कोणत्याही सामान्य कुटुंबाची नसून एकेकाळी हैदराबादचे दिवाण असलेल्या सालार जंग कुटुंबाची आहे. आता या प्रकरणाचा तपास महाराष्ट्राच्या आर्थिक गुन्हे शाखेने हाती घेतला आहे आणि खासदाराच्या ड्रायव्हरचे सालार जंग कुटुंबाशी काय संबंध आहे याचा तपास सुरू आहे.
चालक जावेद रसूल शेख गेल्या १३ वर्षांपासून खासदार संदीपान भुमरे आणि त्यांचा मुलगा विलास भुमरे यांची गाडी चालवत आहे. या प्रकरणावर चालक जावेद रसूल शेख याने प्रतिक्रिया दिली. ते म्हणाले, 'मी पोलिसांना पूर्ण सहकार्य करत आहे'. टाईम्स ऑफ इंडियाच्या वृत्तानुसार, जावेद रसूल म्हणाले की, सालार जंग कुटुंबाशी माझे खूप चांगले संबंध आहेत. म्हणूनच त्यांनी मला ही जमीन 'बक्षिसपत्र' म्हणून दिली आहे. ही जमीन जालना रोडवरील दाऊदपुरा परिसरात आहे, ही एक अतिशय महत्त्वाची जागा आहे. दरम्यान,आता या प्रकरणाची चर्चा सुरू आहे.
या प्रकरणात चालक जावेदला समन्स बजावण्यात आल्याचे पोलिस आयुक्त प्रवीण पवार यांनी सांगितले. परभणी येथील एका वकिलाने या व्यवहाराबाबत प्रश्न उपस्थित केले होते आणि त्यानंतर समन्स बजावण्यात आले आहेत. वकिलांनी सांगितले की, कोणीही ड्रायव्हरला इतकी महागडी आणि उत्तम ठिकाणची जमीन का भेट देईल? अशा परिस्थितीत या बक्षिसपत्राची चौकशी झाली पाहिजे. या प्रकरणात माहिती गोळा करण्यासाठी पोलिसांनी मीर मजहर अली खान आणि सालार जंग कुटुंबातील इतर ६ सदस्यांशी संपर्क साधला आहे. या बक्षिसपत्राबाबत कुटुंबाकडून अद्याप कोणतीही माहिती देण्यात आलेली नाही.
चालकाबाबत असलेल्या गोष्टी आम्हाला माहित नाहीत- विलास भुमरे
या प्रकरणावर खासदार संदीपान भूमरे यांच्या मुलाने विलास भुमरे यांनी प्रतिक्रिया दिली. विलास भुमरे म्हणाले की, हे प्रकरण ड्रायव्हरशी संबंधित आहे, आर्थिक गुन्हे शाखेच्या पथकाने माझीही चौकशी केली आहे. जावेद आमचा ड्रायव्हर असला तरी त्याच्याशी संबंधित सर्व गोष्टींवर आमचे नियंत्रण नाही. सालार जंग कुटुंबाशी संबंधित अनेक लोकांनी हैदराबादच्या निजामाजवळ काम करत होते. यामुळे त्यांच्या कुटुंबाच्या नावावर मोठ्या प्रमाणात जमीन आणि इतर संस्था आहेत.