वाळूज महानगरात रिमझिम पाऊस

वाळूज महानगर : वाळूज महानगर परिसरात सोमवारी (दि.१४) दुपारी २ वाजेच्या सुमारास हलका रिमझिम पाऊस पडला. गत दोन दिवसांपासून औद्योगिक परिसरात ढगाळ वातावरण असून, सूर्यदर्शन झालेले नाही. सोमवारी सकाळपासून ढगाळ वातावरण असल्यामुळे अवकाळी पाऊस पडण्याची चिन्हे दुपारी २ वाजेच्या सुमारास या परिसरात हलका रिमझिम पाऊस पडल्यामुळे वातावरणात गारवा पसरला होता.

--------------------------

साईनगरात रस्ते झाले अरुंद

वाळूज महानगर : पंढरपुरातील साईनगरात नागरिकांनी घरासमोर अतिक्रमणे केल्यामुळे रस्ते अरुंद झाले आहेत. घरासमोर अतिक्रमण करून ओटे तसेच स्वच्छतागृहे बांधली आहेत. या अतिक्रमणांमुळे रस्ते अरुंद झाले असून ये-जा करणाऱ्या नागरिकांना गैरसोयीचा सामना करावा लागत आहेत. याविरुद्ध ग्रामपंचायत प्रशासन कारवाई करण्यास धजावत नसल्यामुळे नागरिकांनी नाराजी व्यक्त केली आहे.

--------------------------

जोगेश्वरीत अंतर्गत रस्त्यावर खड्डे

वाळूज महानगर : जोगेश्वरीतील अंतर्गत रस्त्यावर ठिकठिकाणी खड्डे पडल्यामुळे गैरसोयीचा सामना करावा लागत आहे. येथील न्यू आंबेडकरनगर, जुने गाव, जि.प.शाळा परिसर आदी भागातील अंतर्गत रस्त्यावरील खडी निखळून खड्डे पडले आहेत. या खड्ड्यांत वाहने आदळत आहे. रस्त्याची डागडुजी करण्याची मागणी नागरिकांतून केली जात आहे.

--------------------------

नंदीग्राम मित्र मंडळ कार्यकारिणी जाहीर

वाळूज महानगर : वाळूज महानगरातील नंदीग्राम मित्र मंडळाची कार्यकारिणी जाहीर करण्यात आली. अध्यक्ष - आय. जी. जाधव, कार्याध्यक्ष - बी. जी. गायकवाड, विजय उखळे, उपाध्यक्ष - यू. एम. किरतवाड, सचिव - एफ. बी. शेख, सहसचिव - शंकर नन्नुरे, विरभद्र वनशेट्टी, कोषाध्यक्ष - उत्तम चिकाळे, दत्तात्रय देशमुख, चरण खराडे, संघटक - आर. डी. जाधव, ज्ञानोबा तिडके, नागेश कुठारे, शिवाजी तुरटवाड, राहुल आंबटवाड, शेख हैदर, रामराव नरवडे, जे. टी. पवार, अरीफ पठाण, मार्गदर्शक - बालाजी शिंदे, बालाजी जाधव, संजय सांभाळकर, डॉ. अमर कोडगिरे, माधव पाटील आदी.

--------------------------

वाळूजला पालेभाज्या स्वस्त

वाळूज महानगर : वाळूजच्या आठवडी बाजारात पालेभाज्या स्वस्तात विक्री होत असल्यामुळे कामगार ग्राहकांना दिलासा मिळाला आहे. सोमवारी आठवडी बाजारात शेतकरी व विक्रेत्यांनी मोठ्या प्रमाणात पालेभाज्या विक्रीसाठी आणल्या होत्या. मात्र, ढगाळ वातावरण व दुपारनंतर हलका पाऊस सुरू झाल्याने विक्रेत्यांनी कवडीमोल भावात पालेभाज्यांची विक्री केली.

--------------------------

बजाजनगरात सार्वजनिक स्वच्छतागृह उभारा

वाळूज महानगर : बजाजनगरात सार्वजनिक स्वच्छतागृह उभारण्याची मागणी नागरिकांनी केली आहे. उद्योगनगरीतील सर्वात मोठ्या कामगार वसाहतीत एकही सार्वजनिक स्वच्छतागृह नसल्यामुळे महिला व नागरिकांची कुचंबणा होत आहे. कोलगेट चौकातील स्वच्छतागृह अतिक्रमण हटाव मोहिमेत पाडण्यात आले आहे. त्यामुळे बाजारपेठेत खरेदीसाठी येणाऱ्या नागरिकांनाही गैरसोयीचा सामना करावा लागत आहे. या परिसरात सार्वजनिक स्वच्छतागृह उभारण्याची मागणी मंदा गाडेकर, सिद्राम पारे, सुरेश गाडेकर आदींनी केली आहे.

--------------------------

उद्योगनगरीत दिशादर्शक फलक लावा

वाळूज महानगर : वाळूज एमआयडीसी परिसरातील अनेक सेक्टरमध्ये दिशादर्शक फलक नसल्यामुळे कामगार व व्यावसायिकांना गैरसोयीचा सामना करावा लागतो. औद्योगिक क्षेत्रात रोजगाराच्या शोधात दररोज कामगाराची ये-जा सुरू असते. याशिवाय मालाची ने-आण करणाऱ्या वाहनांची सारखी वर्दळ असते. मात्र, सेक्टरमध्ये दिशादर्शक फलक नसल्यामुळे कंपन्यांचा शोध घेताना कामगार व वाहतूकदारांची चांगलीच दमछाक होत असते.

--------------------------

धोकादायक विद्युत डीपी हटवा

वाळूज महानगर : वाळूजकडून कमळापूरकडे जाणाऱ्या ट्रक टर्मिनललगत रस्त्याच्या बाजूला विद्युत डीपी आहे. या रस्त्यावर वाहनाची सतत ये-जा सुरू असल्याने डीपीवर वाहने धडकण्याची शक्यता नाकारता येत नाही. याच बरोबर नागरी वसाहतीतील मुलेही या डीपीजवळ खेळत असल्यामुळे विजेचा धक्का लागण्याची भीती आहे. धोकादायक विद्युत डीपी हटविण्याची मागणी नागरिकांतून केली जात आहे.

---------------------- ----