देवीच्या मूर्तींना रेडिमेड वस्त्र...!

औरंगाबाद : नवरात्रोत्सव अवघ्या १२ दिवसांवर येऊन ठेपला आहे. कमी कालावधीत जास्तीत जास्त देवीच्या मूर्ती तयार करण्यात मूर्तिकार मग्न झाले आहेत. मूर्तिकारांच्या हातातून देवीची अनेक रूपे साकारले जात आहेत. रेडिमेड वस्त्र घातलेल्या मूर्ती यंदाचे आकर्षण ठरीत आहेत.
लाडक्या गणरायाला निरोप दिल्यानंतर आता शहरवासीयांना नवरात्रोत्सवाचे वेध लागले आहेत. मूर्तिकारांनी आता आपले लक्ष देवीच्या मूर्ती तयार करण्याकडे केंद्रित केले आहे. गणेशोत्सवाच्या तुलनेत नवरात्रोत्सवात सार्वजनिक मंडळांची संख्या कमी असते. यामुळे मूर्तिकारही देवीच्या ठराविक मूर्ती तयार करतात. गुजरातहून आलेले मूर्तिकार मोठ्या मूर्ती तयार करीत आहेत. मात्र, स्थानिक मूर्तिकार मध्यम आकारातील मूर्ती तयार करीत आहेत. स्थानिक मूर्तिकारांनी यंदा रेडिमेड वस्त्र घालून मूर्र्तींना आणखी आकर्षक बनविले आहे. गुलाबी, पिवळ्या रंगातील वस्त्रांनी देवीच्या मूर्ती अधिक खुलून दिसत आहेत. दुर्गा मातेच्या विविध मूर्ती दरवर्षी तयार करण्यात येतात. मागील काही वर्षांपासून सरस्वती देवी, कालिका माता, तुळजाभवानी माता, कोल्हापूरची महालक्ष्मी, सप्तशृंगी देवीच्या मूर्तीही साकारण्यात येत आहेत. मूर्तिकार नंदकुमार परदेशी यांनी सांगितले की, पूर्वी देवीची मूर्ती आम्ही तयार करीत होतो व भाविक ती खरेदी करून नंतर सुवासिनी त्या मूर्तीला साडी नेसवत. मात्र, आता आम्हीच मूर्तीसोबत साडीसारखे वस्त्र परिधान करून देत आहोत. यामुळे मूर्ती अधिक खुलून दिसत आहेत, अशा वस्त्राने सजविलेल्या मूर्र्तींना किंमतही अधिक मिळत आहे. गणेशोत्सवात सर्वप्रथम लालबागच्या राजाच्या मूर्तीला असे रेडिमेड वस्त्र परिधान करून देण्यास सुरुवात झाली. हा ट्रेंड आता नवरात्रोत्सवात दिसत आहे. सार्वजनिक नवरात्रोत्सवात बहुतांश मंडळे दुर्गा मातेच्या मूर्तीची स्थापना करतात, तर विविध शाळांमधून सरस्वती देवीची स्थापना केली जाते. मागील काही वर्षांपासून कालिका मातेच्या मूर्तीलाही मागणी वाढली आहे. यामुळे यंदा लहान आकारातील कालिका मातेच्या मूर्ती तयार करण्यात आल्याचे मूर्तिकारांनी सांगितले.