पूजा, पीयूष कापडिया यांना ‘ग्रीन बिल्डिंग’ पुरस्कार

नवसंकल्पनांचा आविष्कार करणारे शहरातील आर्किटेक्ट पूजा व पीयूष कापडिया यांना ‘ग्रीन बिल्डिंग’ पुरस्कार प्रदान करण्यात आला.

औरंगाबाद : इंडियन ग्रीन बिल्डिंग कौन्सिल या राष्ट्रीय संस्थेतर्फे दरवर्षी देशातील सर्वोत्कृष्ट ग्रीन बिल्डिंग्जना पुरस्कार देऊन गौरविण्यात येते. यंदा नवसंकल्पनांचा आविष्कार करणारे शहरातील आर्किटेक्ट पूजा व पीयूष कापडिया यांना ‘ग्रीन बिल्डिंग’ पुरस्कार प्रदान करण्यात आला.
जयपूर येथे आयोजित सोहळ्यात आयजीबीसीचे अध्यक्ष पद्मश्री सी.एन. राघवेंद्रन यांच्या हस्ते पूजा व पीयूष कापडिया यांना पुरस्कार प्रदान करण्यात आला. कापडिया यांनी शांतिनिकेतन कॉलनी येथील प्लॉट नं.१६, ‘हीर-राधा’ येथे उभारलेली अभिनव व ग्रीन बिल्डिंग आवश्यक निकषाप्रमाणे त्यांच्या स्वत:च्या घराची निवड या पुरस्काराकरिता केली गेली. ‘ग्रीन’ निकषामध्ये बांधलेले हे घर महाराष्ट्रातील प्रथम क्रमांकाचे घोषित करण्यात आले व यास ‘प्लॅटिनम रेटेड’ हा सर्वोत्कृष्ट दर्जाचा पुरस्कार देण्यात आला. या पुरस्कारासाठी देशभरातून ४२०० नामांकनांतून ११०० वेगवेगळ्या वापरांच्या इमारतीची निवड करण्यात आली होती.
निवासी उपयोगी बंगलोजकरिता ६ नामांकने होती. त्यातून कापडिया यांना पुरस्कार मिळाला. प्रकल्पाच्या सादरीकरणाची मांडणी डॉ. अन्शुल गुजराथी, इको सोल्युशन्स, पुणे यांनी केली, तसेच स्ट्रक्चरल डिझाइन एल.एस. जयगोपाल, कोइमतूर व लॅण्डस्केप डिझाइन आर्कि. योगेंद्र बल्लाळ यांनी स्वीकारली.