पोलीस जखमी : ठाण्यात तरुणांची घोषणाबाजी

बीड : जालना रस्त्यावर काही तरुण एका हॉटेलवर दगडफेक करत होते. यावेळी पोकॉ रुपेश शिंदे हे तरुणांची ‘व्हिडिओ रेकॉर्डिंग’ करत होते. दुचाकीवरुन आलेल्या दोघांनी त्यांच्या डोक्यात दगड मारुन धूम ठोकली.

बीड : जालना रस्त्यावर काही तरुण एका हॉटेलवर दगडफेक करत होते. यावेळी जिल्हा विशेष शाखेचे पोकॉ रुपेश शिंदे हे तरुणांची ‘व्हिडिओ रेकॉर्डिंग’ करत होते. दुचाकीवरुन आलेल्या दोघांनी त्यांच्या डोक्यात पाठीमागून दगड मारुन धूम ठोकली. यात शिंदे जखमी झाले.
दुचाकी क्रमांक पोलिसांनी ओळखला असून त्यावरुन दोघांवर शिंदे यांनी शासकीय कामकाजात अडथळा निर्माण करून दगड मारून जखमी केल्याची फिर्याद शिवाजीनगर ठाण्यात नोंदवली आहे.
यावेळी काही तरुणांना पोलिसांनी ताब्यात घेऊन शिवाजीनगर ठाण्यात आणले. तेथे रॅलीतील तरुणांचा मोठा जमाव जमला. यावेळी महापुरुषांचा जयघोष करण्यात आला.
जमाव आक्रमक झाल्याने तेथे उपअधीक्षक गणेश गावडे यांनी धाव घेतली. जमाव पांगविण्याचा प्रयत्न करुनही कार्यकर्ते ठाणे सोडायला तयार नव्हते. त्यामुळे पोलिसांनी बळाचा वापर करावा लागेल, असा इशारा दिला. त्यानंतर कार्यकर्ते पांगले.
मोमीनपुरा भागात
काही वेळ तणाव
बीड : रॅलीतील काही तरुणांनी मोमीनपुरा भागात दगडफेक केल्यामुळे तणाव निर्माण झाला होता. यावेळी स्थानिक रहिवाशांनीही प्रत्युत्तरादाखल दगडफेक केली. त्यात तिघे जण जखमी झाले. त्यांच्यावर खाजगी दवाखान्यात उपचार सुरू आहेत. सामाजिक कार्यकर्त्यांच्या पुढाकाराने हा तणाव निवळला. त्यानंतर पोलीस दाखल झाले.
गेवराई तालुक्यात
शंभर टक्के बंद
गेवराइ शहरात १०० टक्के बंद पाळण्यात आला. सर्वपक्षीय पदाधिकारी, कार्यकर्त्यांच्या वतीने छत्रपती शिवाजी महाराज चौकातून निषेध रॅली काढण्यात आली. शास्त्री चौक, माळी गल्ली, मोमीनपुरा, भवानीपेठ, चिंतेश्वर गल्ली, तहसील कार्यालय परिसर मार्गे ही रॅली पुन्हा चौकात दाखल झाली. तलवाडा, मादळमोही, उमापूर, पाडळसिंगी येथेही बंद पाळण्यात आला. यावेळी पोलिसांचा चोख बंदोबस्त होता.
परळीत प्रतिसाद
शहरात सकाळपासूनच कडकडीत बंद पाळण्यात आला. कार्यकर्त्यांनी दुचाकीवरून शहरभर फिरून बंदचे आवाहन केले. या आवाहनाला विक्रेत्यांनी प्रतिसाद दिला. राणी लक्ष्मीबाई टॉवर चौकात तहसीलदार विद्याचरण कडवकर यांना निवेदन देण्यात आले. महापुरुषांच्या जयघोषाने शहर दणाणून गेले. सर्वपक्षीय कार्यकर्त्यांनी बंदमध्ये सहभाग नोंदविला. पोलिसांचा चोख बंदोबस्त होता.
माजलगावात
व्यापारपेठ ठप्प
माजलगाव :येथे विविध पक्ष- संघनांतर्फे कडकडीत बंद पाळण्यात आला. व्यापाऱ्यांनी उत्स्फूर्त प्रतिसाद दिल्याने दिवसभर व्यवहार ठप्प होते. कार्यकर्त्यांनी संभाजी राजे चौक, शिवाजी महाराज चौक, डॉ. बाबासाहेब आंबेडकर चौक, मोंढा भागात रॅली काढून बंदचे आवाहन केले. बंद शांततेत झाला. पोलिसांचा कडेकोट बंदोबस्त तैनात होता.
अंबाजोगाई, शिरूरात आज बंद
अंबाजोगाई : महापुरुषांबद्दल अवमानकारक वक्तव्य करणाऱ्या विठ्ठल तिडकेवर कठोर कारवाई करण्याच्या मागणीसाठी मंगळवारी अंबाजोगाई व शिरूर येथे बंदची हाक देण्यात आली आहे.
अंबाजोगाई विविध पक्ष संघटनांच्या कार्यकर्त्यांची बैठक सोमवारी सायंकाळी पार पडली. यात बंद यशस्वी करण्याचे आवाहन करण्याचा निर्णय घेण्यात आला.
शिरूरमध्ये तिडकेविरोधात कडक कारवाई करण्याची मागणी सकळ मराठा समाजाच्या वतीने अ‍ॅड. हरी कोठुळे, संतोष गुजर, शरद चव्हाण, भारत पानसंबळ, दीपक खोले, साईनाथ देशमुख, अशोक मोरे आदींनी निवेदनाद्वारे केली आहे.