मेटे म्हणाले, स्व. मुंडे यांच्यानंतर फडणवीसच...

!बीड : स्वर्गीय गोपिनाथ मुंडे यांच्या नंतर मुख्यमंत्री देवेंद्र फडणवीसच, असा पलटवार आ. विनायक मेटे यांनी मुख्यमंत्र्यासमोर करून पालकमंत्री पंकजा मुंडे विरूध्द आ. मेटे या वादाला मुख्यमंत्र्यांसमोरच तोंड फोडण्याचा पुन्हा एकदा प्रयत्न केल्याचे प्रत्ययास आले. यावेळी आ. मेटे यांनी ग्रामविकास मंत्री पंकजा मुंडे यांच्या नेत्तृत्वाला बगल देत म्हटले की, जिल्हयातील जनता स्वर्गीय गोपिनाथ मुंडे यांच्यानंतर विकासाच्या अपेक्षेने मुख्यमंत्री देवेंद्र फडणवीस यांच्याकडे बघते आहे. विदर्भाच्या धरतीवर मराठवाडा व बीड जिल्हयाचा विकास होईल अशी अपेक्षा आहे. त्यामुळे मुख्यमंत्री फडणवीस यांच्यावर मोठी जबाबदारी आहे असा टोला आ. मेटे यांनी कोणाचेही नाव न घेता लगावल्याने पंकजा मुंडे यांच्या नेत्तृत्वाला त्यांचा विरोध असल्याच्या छुप्या चर्चेला मुख्यमंत्र्यांसमोरच दुजोरा मिळाला.यावर पंकजा मुंडे यांनीही आपल्या भाषणातून मुख्यमंत्री विदर्भातील आहेत आणि मी मराठवाड्यातील आहे. आम्ही दोघांनीही दुष्काळ जवळून पाहिला आहे. त्यामुळे आम्ही तळमळीने काम करत आहोत, असे सांगत आपणच मराठवाड्याचे नेतृत्व करत असल्याचे अप्रत्यक्षपणे सांगून टाकले.गेली काही दिवसांपासून मुंडे आणि मेटे यांच्यातील दुरावा वाढत असल्याची चर्चा कार्यकर्त्यांमध्ये सुरू आहे. रेल्वेचा प्रश्न घेऊन रेल्वेमंत्र्यांना मेटे एकटेच भेटायला गेल्यानंतर त्यांच्यातील दुराव्याची चर्चा जाहीरपणाने होऊ लागली होती. दुष्काळाची पहाणी करण्यासाठी बीड जिल्हयाच्या दौऱ्यावर आलेले राज्याचे मुख्यमंत्री देवेंद्र फडणवीस यांच्या हस्ते बीड तालुक्यातील पालवण येथील यशवंत बहुउद्देशीय सेवाभावी संस्थेच्या वतीने सुरू करण्यात आलेल्या चारा छावणीचे उदघाटन करण्यात आले. सकाळी ८:३० वाजता मुख्यमंत्र्याचे पालवण येथे आगमन झाले.पालकमंत्री पंकजा मुंडे, पाणी पुरवठा व स्वच्छता मंत्री बबनराव लोणीकर, आ. संगीता ठोंबरे, आ. आर. टी. देशमुख, आ. भीमराव धोंडे. आ. विनायक मेटे, शिवसंग्राम युवक आघाडीचे प्रदेशाध्यक्ष राजेंद्र मस्के, जिल्हाध्यक्ष दिलीप गोरे, भाजपाचे जिल्हाध्यक्ष रमेश पोकळे, सलीम जहाँगीर, अशोक लोढा, गणेश वरेकर, अ‍ॅड. सर्जेराव तांदळे यांची उपस्थिती होती. (प्रतिनिधी)