छत्रपती संभाजीनगरात शासकीय वसतिगृहाच्या जेवणात पाल; ४ दिवसांनी कंत्राटदारावर गुन्हा

सर्वच स्तरांतून टीका झाल्यानंतर घटनेच्या चार दिवसांनी प्रभारी गृहप्रमुख आतिष ससाणे यांच्या तक्रारीवरून कंत्राटदार डी. एम. एंटरप्रायजेसवर गुन्हा दाखल

छत्रपती संभाजीनगर : किलेअर्क परिसरातील डॉ. बाबासाहेब आंबेडकर मुलांच्या वसतिगृहात सायंकाळच्या जेवणात पाल निघाल्याची धक्कादायक घटना मंगळवारी उघडकीस आली. सर्वच स्तरांतून टीका झाल्यानंतर घटनेच्या चार दिवसांनी प्रभारी गृहप्रमुख आतिष ससाणे यांच्या तक्रारीवरून मेसचा कंत्राटदार डी. एम. एंटरप्रायजेसचा योगीराज नागनाथअप्पा गौरशट्टे याच्यावर बेगमपुरा पोलिस ठाण्यात गुन्हा दाखल करण्यात आला. 

हे कंत्राट मुंबईस्थित डी. एम. इंटरप्रायजेस ई गव्हर्नन्स सोल्युशन्स प्रा. लि. कंपनीकडे आहे. कंपनीचा प्रतिनिधी योगीराज गौरशेट्टेला घडलेल्या प्रकारासाठी जबाबदार धरत त्याच्यावर गुन्हा दाखल करण्यात आला. बीएनएस २७५ (अपायकारक खाद्यपदार्थांची विक्री), १२५ (इतरांचे जीवित किंवा व्यक्तिगत सुरक्षितता धोक्यात आणणारी कृती) व २३८ (अपराध्याला वाचवण्यासाठी पुरावे नष्ट करणे किंवा खोटे बोलणे) या कलमांतर्गत ही कारवाई करण्यात आली.

काय आहे प्रकरण?डाॅ. बाबासाहेब आंबेडकर १००० मुलांच्या वसतिगृह संकुलात चार युनिट आहेत. प्रत्येक युनिट हे २५० विद्यार्थी क्षमतेचे आहे. युनिट नंबर १ मधील विद्यार्थी मंगळवारी नेहमीप्रमाणे रात्रीच्या जेवणासाठी मेसमध्ये गेले. ८० टक्के विद्यार्थ्यांचे जेवण झाले होते. उर्वरित २० टक्के विद्यार्थी जेवत होते. तेव्हा भाजी घेत असताना एकाच्या पळीत (मोठा चमचा) शिजलेली पाल आली. हे पाहताच जेवणासाठी बसलेल्या विद्यार्थ्यांत खळबळ उडाली; काहींनी उलट्या केल्या, तर अनेक विद्यार्थी मेस सोडून बाहेर पडले. काही विद्यार्थ्यांनी गृहपाल धनेधर व वर्शीळ यांना फोन केला, तर काहींनी चक्क सहायक आयुक्त रवींद्र शिंदे यांनाच वसतिगृहात घडलेला प्रकार सांगितला. शिंदे तातडीने वसतिगृहात दाखल झाले. तेव्हा विद्यार्थ्यांनी घोषणाबाजी करत त्यांना घेराव घातला. त्यानंतर मळमळ झालेल्या विद्यार्थ्यांना लगेच दवाखान्यात पाठविण्यात आले. डॉक्टरांनी तपासून औषधोपचार केले व त्यांना परत पाठविले.