"लव्ह औरंगाबाद"च्या धर्तीवर "थॅंक्यू डॉ. आंबेडकर" डिस्प्ले

भडकलगेट येथील डॉ. बाबासाहेब आंबेडकर यांच्या पुतळ्याजवळ हा डिस्प्ले उभारण्यात आला आहे. यास विजय साळवे, सचिन निकम, गुणरत्न सोनवणे, विशाल बोर्डे, अनमोल लिहिणार, अमोल कतले, विशाल बनकर यांनी सहकार्य केले आहे.

जगभर कोरोनाने थैमान घातले असून, सण, उत्सवाच्या उत्साहाची जागा भीतीने घेतली आहे. यातच सलग दोन वर्षे भीमजयंती साजरी न करता आल्याने आंबेडकरी युवकांत निराशा आलेली होती. परंतु ही निराशा दूर सारत लोकोपयोगी उपक्रम राबवून भीमजयंती साजरी करण्यात येत आहे.

यापूर्वी औरंगाबाद महानगरपालिकेने शहराच्या सौंदर्यात भर घालण्याकरिता ''लव्ह औरंगाबाद''चे डिस्प्ले बोर्ड उभारले आहेत. त्याच आनुषंगाने या तरुणांनी ''थँक्यू डॉ. आंबेडकर'' हा डिस्प्ले तयार केले आहे.

डॉ. बाबासाहेबांच्या जयंतीनिमित्त हजारोंच्या संख्येने आनुयायी भडकलगेट येथे अभिवादन करण्यासाठी येतात. आता अभिवादनासोबत या ठिकाणी बाबासाहेबांप्रति कृतज्ञतापूर्वक नतमस्तक होण्यासाठी हा फलक लावण्यात आला आहे. दरम्यान, या डिस्प्लेचे अनावरण कोणत्याही राजकीय व्यक्तींच्या हस्ते न करता लहान मुलाच्या हाताने करण्यात आले.