बजाजनगर खून प्रकरणातील अनोळखी महिलेची ओळख पटेना

: मृतदेह शवागृहात पडून

: मृतदेह शवागारात पडून

वाळूज महानगर : बजाजनगरात खून करून टाकलेल्या महिलेची चार दिवसांपासून अद्याप ओळख पटलेली नाही. त्यामुळे पोलिसांच्या तपासाला ब्रेक लागला असून त्या तो मृतदेह ओळख पटविण्यासाठी शासकीय रुग्णालयातील शवागारात पडून आहे.

बजाजनगरच्या एसटी कॉलनीत २ जून रोजी सकाळी ६ वाजेच्या सुमारास अर्धनग्न व ओढणीने हात बांधलेल्या एका अनोळखी महिलेचा मृतदेह आढळला. सदर महिला तीन महिन्याची गर्भवती असल्याची शवविच्छेदनातून समोर आले. गत चार दिवसापासून या मृतदेहाची ओळख पटविण्याचे काम एमआयडीसी वाळूज पोलिसांच्यावतीने सुरू आहे. जिल्ह्यात तसेच परजिल्ह्यातील पोलीस ठाण्यात या महिलेचे वर्णन व छायाचित्रे पाठविली आहेत. बजाजनगरातील मुख्य चौक, रस्ते व औद्योगिक क्षेत्रातील सीसीटीव्ही कॅमेऱ्यांची तपासणी पोलिस यंत्रणेकडून करण्यात आलेली आहे. पेहरावावरून ही महिला परप्रांतीय असण्याची शक्यता वरिष्ठ पोलिस अधिकाऱ्यांनी वर्तविली आहे.

त्यानंतरच उलगडणार खुनाचे रहस्य

या मृतदेहाची ओळख पटविण्यासाठी सोशल मीडिया व परिसरातील गावातून कुणी महिला बेपत्ता आहे का, याचा शोध घेतला जात आहे. आज-उद्यापर्यंत तिची ओळख न पटल्यास मृतदेह कुजण्याची शक्यता असल्याने अंत्यसंस्काराची प्रकिया पोलिसांना पार पाडावी लागणार आहे. ओळख पटल्यानंतरच तिच्या खुनाचे रहस्य उलगडण्याची शक्यता पोलिस निरीक्षक मधुकर सावंत, सहायक पोलिस निरीक्षक गौतम वावळे यांनी वर्तविली आहे.

----------------------------