औरंगाबाद : रेल्वे स्टेशन औद्योगिक वसाहतीतील भोगले ऑटोमोटिव्हच्या व्यवस्थापकीय संचालकांना दोन दिवसांपूर्वी रविवारी (दि. ८ ऑगस्ट) काही गुंडांनी कंपनीत घुसून मारहाण केली. भोगले ऑटोमोटिव्ह प्रकरणात पोलिसांनी तिघांना विविध कलमांखाली अटक केली. घटनास्थळावरील सीसीटीव्ही फुटेज व तेथील कामगारांच्या जबाबातून आणखी काही आरोपींची ओळख पटविण्यात आली असून त्यांनाही लवकरच अटक करण्यात येईल अशी माहिती पोलीस आयुक्त डॉ. निखिल गुप्ता यांनी दिली. (An atmosphere of terror in the industrial sector of Auranabad )
या घटनेस ४८ तासही उलटत नाहीत तोच मंगळवारी (दि. १०) रात्री वाळूज एमआयडीसीतील जोगेश्वरी शिवारातील श्रीगणेश कोटिंग कंपनीचे व्यवस्थापक शिरीषकुमार राजेभोसले (रा. नक्षत्रवाडी) हे कंपनीतून दुचाकीने घरी परतत असताना, १० ते १५ जणांच्या टोळक्याने त्यांना रस्त्यात अडवून बेदम मारहाण केली. या मारहाणीत राजेभोसले यांचा डावा हात मोडला असून डोळ्याजवळ मोठी जखम झाली. छातीला व शरीराला मुका मार लागला. या कंपनीत कंत्राटी कामगार पुरविण्याचा ठेका देण्याच्या कारणावरून विविध पक्षांच्या कार्यकर्त्यांकडून धमक्या दिल्या जात असल्याचे राजेभोसले यांचे म्हणणे आहे.
एमआयडीसीत गुंडगिरी वाढली; कंत्राट देण्याच्या कारणावरून व्यवस्थापकाला रस्त्यात अडवून मारहाण
या घटनांमुळे दहशतीखाली आलेले उद्योजक व त्यांच्या संघटनांनी पत्रकार परिषद घेऊन, गुंडांना आवरा, अन्यथा उद्योगांना येथून आपले बस्तान हलवावे लागेल, असा इशाराच दिला आहे. सीआयआयचे अध्यक्ष रमण अजगावकर, औरंगाबाद फर्स्टचे अध्यक्ष प्रीतेश चटर्जी, मसिआचे उपाध्यक्ष अनिल पाटील, अखिल अब्बास, रवी माछर, मानसिंग पवार, संदेश झांबड आदींची या पत्रकार परिषदेला उपस्थिती होती. शिवाय ज्येष्ठ उद्योजक राम भोगले, सीएमआयएचे अध्यक्ष शिवप्रसाद जाजू यांनीही या घटनेचा निषेध नोंदविला आहे.
कुणाचीही गुंडगिरी पोलीस खपवून घेणार नाहीतशहराचे पोलीस आयुक्त डॉ. निखिल गुप्ता यांनी सांगितले की, औद्योगिक वसाहतीत घडलेल्या या प्रकरणात गुन्हे दाखल करण्यात आले आहेत. भोगले ऑटोमोटिव्ह प्रकरणात अटकेतील तिघांना सहज जामीन मिळणार नाही, अशीही कलमे आहेत. आणखी काही आरोपींची ओळख पटविण्यात आली असून त्यांनाही लवकरच अटक करण्यात येईल. शहरात कुणाचीही गुंडगिरी पोलीस खपवून घेणार नाहीत, असा इशारा त्यांनी दिला. तर जिल्ह्याचे पालकमंत्री व राज्याचे उद्योगमंत्री सुभाष देसाई यांनीही, उद्योग क्षेत्रात गुंडगिरी सहन केली जाणार नाही असे सांगून, जिल्ह्यात उद्योग क्षेत्र वाढत असताना वातावरण खराब करण्याचा काहीजण प्रयत्न करीत आहेत, तो सर्व मोडून काढण्यात येईल, असा इशारा दिला.