छत्रपती संभाजीनगर : हिमायतबाग ते सत्यविष्णू रुग्णालय मार्गावर सुसाट एका अल्पवयीन कारचालकाने दोन दुचाकीस्वारांना धडक देऊन पोबारा केला. विशेष म्हणजे, त्याची कार विजेच्या खांब्याला धडकून एका दुचाकीने पेटदेखील घेतला. तरीही तो कार मागे घेत त्याच वेगात पसार झाला. मंगळवारी सायंकाळी ६:३० वाजता घडलेल्या घटनेत दोन तरुण जखमी झाले.
प्रत्यक्षदर्शींनी दिलेल्या माहितीनुसार, एन-१३ परिसरात एक मोपेडस्वार सायंकाळी ६:३० वाजण्याच्या सुमारास हिमायत बागेकडून सत्यविष्णू रुग्णालयाच्या दिशेने जात होता. यावेळी मागून आलेल्या एका सुसाट कारने त्याला धडक दिली. कारचा वेग अधिक असल्याने मोपेडस्वार जवळपास २० ते २५ फूट दूर फेकला गेला. त्यानंतर अन्य एका दुचाकीस्वाराला उडवून कार मोपेडसह विद्युत खांबाला धडकली. यात दुचाकीचा स्फोट होऊन पेट घेतल्याने अर्धीअधिक दुचाकी खाक झाली. शिवाय, कारच्या धडकेत विद्युत खांब वाकून नुकसान झाले. स्थानिकांनी धाव घेत जखमींना रुग्णालयात दाखल केले. बुधवारी महावितरणच्या कर्मचाऱ्यांकडून पोलची दुरुस्ती करण्यात आली.
स्थानिकांच्या दाव्यानुसार, चालक अल्पवयीन होता. जखमींना खासगी रुग्णालयात दाखल करण्यात आले. त्यांच्या पायाला जखम झाली असून, त्यांनी तक्रार देण्यास नकार दिल्याचे सिटी चौक पोलिसांनी सांगितले. रात्री उशिरा पोलिसांनीच फिर्यादी होत गुन्हा दाखल करण्याची प्रक्रिया सुरू केली.