छत्रपती संभाजीनगर : जुगारात पैसे जिंकल्यावर तेथून घरी जाणाऱ्या तरुणाला पाचजणांनी रोखले. पुन्हा जुगार खेळायला बस म्हणत लाकडी दांड्याने बेदम मारहाण केली. पिस्तूलसदृश शस्त्र दाखवून गोळ्या घालण्याची धमकी दिली. तसेच, त्याच्याकडील ११ हजार रुपये हिसकावून घेतले. ही घटना आंबेडकरनगरातील गौतमनगरात १८ जूनच्या रात्री ११:३० वाजण्याच्या सुमारास घडली. या प्रकरणी सिडको पोलिसांनी गुन्हा नोंदवला आहे.
टिक्या आदमाने, अजय आदमाने, मुन्ना, दाद्या आणि मनोहर आदमाने (सर्व रा. गल्ली नं. १५, आंबेडकरनगर), अशी आरोपींची नावे आहेत. यातील मनोहरला पोलिसांनी अटक केली. राहुल हिवराळे (रा. नवभारत सोसायटी, एन ८) याने दिलेल्या फिर्यादीनुसार बुधवारी तो आंबेडकरनगरातील गौतमनगर येथील गल्ली नं. १५ येथे मन्नू दाजी याच्या अड्ड्यावर दारू प्यायला. नंतर त्याच्याच घरात सुरू असलेल्या जुगाराच्या डावावर जाऊन बसला. तेथे तो १० ते ११ हजार रुपये जिंकला. त्यानंतर घरी जाण्यासाठी निघाला. तेव्हा आरोपींनी त्याला रोखले.
टिक्याने त्याला परत खेळायला बस म्हणून धमकावले. पैसे जिंकल्यानंतर असे निघून जाऊ शकत नाही, असे सांगून शिवीगाळ व मारहाण केली. त्यात तो गंभीर जखमी झाला. तो बराच वेळ रक्तबंबाळ अवस्थेत पडून होता. आरोपींनी ११ हजार रुपये हिसकावून घेतले. एका ओळखीच्या व्यक्तीने त्याला दवाखान्यात दाखल केल्याचे फिर्यादीत म्हटले आहे. पोलिसांनी मनोहरला न्यायालयात हजर केले असता त्याला तीन दिवसांची पोलिस कोठडी सुनावण्यात आली.