शिवजयंतीचा 'रॉयल' थाट! छ. संभाजीनगरमध्ये हेलिकॉप्टरमधून महाराजांच्या स्मारकांवर पुष्पवृष्टी

हेलिकॉप्टरमधून शिवस्मारकांवर पुष्पवृष्टी करत अभिवादन होताच शिवप्रेमींनी एकच जल्लोष केला

छत्रपती संभाजीनगर : छत्रपती शिवाजी महाराज यांच्या जयंतीनिमित्त गुरुवारी शहरात अभूतपूर्व उत्साह पाहायला मिळाला. नवीन छत्रपती संभाजीनगर गणेश महासंघाच्या शिवजयंती उत्सव समितीच्या वतीने यंदा शहरातील प्रमुख शिवस्मारकांवर हेलिकॉप्टरमधून पुष्पवृष्टी करण्यात आली. आकाशातून होणारा हा फुलांचा वर्षाव आणि शिवरायांचा जयघोष यामुळे संपूर्ण शहर शिवमय झाले होते.

'लोकमत महाराष्ट्रीयन ऑफ द इयर' कोण?... क्लिक करून आपलं मत नोंदवा!

महत्त्वाच्या चौकात पुष्पवृष्टीगुरुवारी सकाळी १०:३० वाजेच्या सुमारास या भव्य सोहळ्याला प्रारंभ झाला. खासदार संदीपान भुमरे, उत्सव समितीचे संस्थापक बबनराव डिडोरे आणि विद्यमान अध्यक्ष ज्योतिराम पाटील यांनी स्वतः हेलिकॉप्टरमध्ये बसून शिवरायांना अभिवादन केले. जयभवानीनगर चौक, पुंडलिकनगर, सिडको अविष्कार कॉलनी आणि शहरातील मुख्य केंद्र असलेल्या क्रांतीचौक येथील छत्रपतींच्या पुतळ्यावर गुलाबाच्या पाकळ्यांची उधळण करण्यात आली.

क्रांतीचौकात शिवप्रेमींचा जल्लोषविशेषतः क्रांतीचौक येथे सकाळी ११:३० ते ११:४८ या वेळेत जेव्हा हेलिकॉप्टरने घिरट्या घालत पुष्पवृष्टी केली, तेव्हा उपस्थित हजारो शिवप्रेमींनी एकच जल्लोष केला. "छत्रपती शिवाजी महाराज की जय" अशा घोषणांनी परिसर दुमदुमून गेला होता. आकाशातून पडणाऱ्या फुलांच्या पाकळ्या आपल्या अंगावर घेण्यासाठी आणि हा क्षण मोबाईलमध्ये टिपण्यासाठी नागरिकांनी मोठी गर्दी केली होती.

विविध कार्यक्रमांची रेलचेलशहरातील विविध सार्वजनिक शिवजयंती उत्सव समित्यांच्या वतीनेही यंदा सामाजिक उपक्रम, व्याख्याने आणि सांस्कृतिक कार्यक्रमांचे आयोजन करण्यात आले होते. मात्र, हेलिकॉप्टरमधून झालेली ही पुष्पवृष्टी यंदाच्या शिवजयंतीचे मुख्य आकर्षण ठरली.