चार कुख्यात दरोडेखोर जेरबंद

पाचोड : कोंबिंग आॅपरेशन करून चार कुख्यात दरोडेखोरांनाअटक केली

पाचोड : पैठण तालुक्यातील खंडाळा, सालवडगाव शिवारात पारधी वस्तीवर पाचोड पोलीस, स्थानिक गुन्हे शाखेचे पोलीस, दरोडा प्रतिबंधक पथक आदी पथकाने या शिवारात शुक्रवारी सायंकाळी कोंबिंग आॅपरेशन करून फिल्मी स्टाईलने पाठलाग करून चार कुख्यात दरोडेखोरांना मोठ्या शिताफीने अटक केली आहे. हे थरारनाट्य सहा तास चालले.
शकीन मोमीन चव्हाण (रा. सालवडगाव), भेद्या भुऱ्या भोसले, अमोल बाबुराव पवार , शारेस विठ्ठल काळे (सर्व रा. रहाटगाव, ता. पैठण) अशी अटक करण्यात आलेल्या दरोडेखोरांची नावे आहेत.
पाचोड पोलीस स्टेशनकडून मिळालेल्या माहितीवरून पाचोड पोलीस ठाण्यात अज्ञात व्यक्तीने फोन करून पाचोड परिसरात वडजी, खंडाळा, सालवडगाव शिवारात दरोडेखोर आल्याची माहिती दिली. यानंतर पाचोड पोलिसांनी खात्री केली. नंतर सहायक पोलीस निरीक्षक भगवान धबडगे यांनी तात्काळ पोलीस अधीक्षक अनिल कुंभारे यांना माहिती दिली. यावेळी अनिल कुंभारे यांनी सहायक पोलीस निरीक्षक भगवान धबडगे, फौजदार आर.डी. खुणे, फौजदार संपत पवार, जमादार संतोष सोनवणे, प्रभाकर शेळके, रमेश धस, शिवानंद बनगे, काशीनाथ लुटे, सौदागर सावंत, हनुमान धनवे, स्थानिक गुन्हे शाखेचे फौजदार दीपक सरोदे, जमादार नीलेश गायकवाड, शेख जावेद, संदीप घुनावत, दरोडा प्रतिबंधक पथकाचे सहायक पोलीस निरीक्षक केंद्रे, जमादार शेख कासीम, महेश माळी, अशोक थोरात आदींचे पथक तयार केले.
या पथकाने खंडाळा, सालवडगाव शिवारात सापळा रचला; मात्र दरोडेखोरांना पोलिसांची चाहूल लागताच दरोडेखोर पळून जात होते. या पथकाने त्यांना झडप घालून पकडले. शकीन मोमीन चव्हाण, भेद्या भुऱ्या भोसले, अमोल बाबुराव पवार, शारेस विठ्ठल काळे यांना अटक केली.
यावेळी सहायक पोलीस निरीक्षक भगवान धबडगे म्हणाले की, यातील दरोडेखोरांनी नांदर शिवारात व नानेगाव शिवारात दोन ठिकाणी मारहाण करून लुटले आहे. आणखी बीड, उस्मानाबाद, अहमदनगर, जिल्ह्यात गुन्हे केलेले आहेत.


याबाबत अधिक माहिती घेण्याचे काम सुरू असल्याचे त्यांनी सांगितले. या पथकाने खाजगी वाहने, मोटारसायकलचा वापर केल्यामुळे हा छापा यशस्वी झाल्याची माहिती धबडगे यांनी दिली.