१०१ उमेदवारांचे भवितव्य यंत्रात बंद

केज : येथील केज नगर पंचायतीच्या १७ जागांसाठी रविवारी मतदान प्रक्रिया शांततेत पार पडले. १७ संवेदनशील केंद्रावर सरासरी ७७ टक्के मतदान झाले. पोलीस बंदोबस्त चोख असल्याने कोणत्याही मतदान केंद्रावर गोंधळ झाला नसल्याची माहिती निवडणूक निर्णय अधिकारी प्रशांत सूर्यवंशी यांनी दिली.केज नगर पंचायतीच्या १७ प्रभागातील १७ नगरसेवकांच्या जागेसाठी रविवारी सकाळी ७.३० वाजता मतदान प्रक्रियेला सुरूवात झाली. शहरामधील सर्वच मतदान केंद्रे संवेदनशिल असल्यामुळे प्रत्येक मतदान केंद्रावर तगडा पोलीस बंदोबस्त ठेवण्यात आला होता. सकाळी थंडीचा कडाका असतानाही ८ वाजल्यापासून मतदारांनी रांगा लावण्यास सुरूवात केली होती. ९.३० च्या सुमारास १३.७९ टक्के, ११ वाजता ३०.९० टक्के, दीड वाजता ४८.४४ टक्के, ३.३० वाजता ६३.४८ टक्के तर साडेपाच वाजता सरासरी ७७ टक्के मतदान झाले.निवडणूक निर्णय अधिकारी सूर्यवंशी, तहसीलदार पी. के. ठाकूर यांनी प्रत्येक मतदान केंद्राला वारंवार भेटी दिल्या. कोणत्याही ठिकाणी अनुचित प्रकार घडणार नाही याची खबरदारी घेण्यात आली होती. केज नगर पंचायत निवडणुकीत एकूण १८ हजार ७५० मतदार होते. त्यापैकी पुरूष व महिला अशा एकूण १४ हजार ४२१ नागरिकांनी मतदानांचा हक्क बजावला.३०० पोलिसांची कुमकनिवडणुकीत गोंधळ होऊ नये यासाठी एक पोलीस अधीक्षक, दोन निरीक्षक, पाच सहायक निरीक्षक, १४४ पोलीस कर्मचारी, राज्य राखीव दलाच्या दोन तुकड्या नियुक्त करण्यात आल्या होत्या. मतदान प्रक्रिया सुरू झाल्यानंतर प्रत्येक केंद्रावर पोलिसांची करडी नजर होती. शहरात संपूर्ण मतदान प्रक्रिया कालावधीत पोलिसांनी पेट्रोलिंग केली होती. यामुळे कोणत्याही ठिकाणी अनुचित प्रकार घडला नाही, असे अधीक्षक नवीनचंद्र रेड्डी यांनी सांगितले. (वार्ताहर)सोमवारी सकाळी दहा वाजता तहसील कार्यालयाच्या सभागृहात सहा टेबलवर मतमोजणी होणार आहे. एका फेरीत सहा प्रभागांची मतमोजणी होईल. मतमोजणीच्या तीन फेऱ्या होणार असून १२ वाजेपर्यंत सर्व निकाल जाहीर होतील, अशी माहिती निवडणूक निर्णय अधिकारी प्रशांत सूर्यवंशी यांनी दिली.प्रभाग क्रमांक सहामध्ये मतदान प्रक्रिया सुरू असताना दुपारी भाजपचे उमेदवार व एका अपक्ष उमेदवारामध्ये बाचाबाची झाली. एकाने दुसऱ्याच्या श्रीमुखात भडकावल्याचीही चर्चा आहे. त्यामुळे तणावाचे वातावरण निर्माण झाले होते. पोलिसांनी हस्तक्षेप करून शांतता प्रस्थापित केली.काँग्रेस, राष्ट्रवादी, भाजपाने प्रत्येकी १७ प्रभागांमध्ये १७ उमेदवार उभे केले आहेत. शिवसेना १०, शेकाप ५, मनसे १ तर ३४ अपक्ष असे एकूण १०१ उमेदवार रिंगणात होते. प्रमुख उमेदवारांमध्ये विद्यमान उपनगराध्यक्ष आदित्य पाटील, संदीप इंगळे, पशुपती दांगट, हारूण इनामदार, विद्या पाटील, पुष्पलता भोसले, किसन कदम, अर्चना ढाकणे, दिलीप डोंगरे, डॉ. अरूणा नेहरकर यांचा समावेश आहे.