थकित अनुदानासाठी शेतकऱ्यांचे उपोषण

उस्मानाबाद :शेतकऱ्यांचे १८ कोटी रूपये अनुदान थकीत असून, हे अनुदान मिळावे, यासाठी शेतकऱ्यांनी आता आंदोलनाचे हत्यार उपसले आहे़

उस्मानाबाद : जिल्ह्यातील जरबेरा लागवड, हरितगृह, शेडनेट, शेततळे, शेततळे स्पील, पॅक हाऊस, कांदाचाळ, यांत्रिकीकरण आदी घटकांसाठी सन २०१५-१६ या वर्षातील ५४८ शेतकऱ्योना पूर्वसंमती दिली आहे़ मात्र, निधी अभावी या शेतकऱ्यांचे १८ कोटी रूपये अनुदान थकीत असून, हे अनुदान मिळावे, यासाठी शेतकऱ्यांनी आता आंदोलनाचे हत्यार उपसले आहे़ जिल्हाधिकारी कार्यालयासमोर सोमवारी आमरण उपोषण सुरू करण्यात आले आहे़
जिल्ह्यातील अनेक शेतकऱ्यांनी जरबेरा, हरितगृह, शेडनेट, शेततळे, शेततळे स्पील, पॅक हाऊस, कांदाचाळ, यांत्रीकीकरण आदी घटकांमधून शेती आधुनिक पध्दतीने करण्याचा प्रयत्न सुरू केला आहे़ मात्र, या शेतकऱ्यांच्या प्रयत्नांना शासन-प्रशासनाकडूनच खीळ बसविण्यात येत असल्याचे चित्र आहे़ जिल्ह्यातील ५४८ शेतकऱ्यांना शासनाने सन २०१५-१६ या वर्षात पूर्वसंमती दिली होती़ त्यामुळे शेतकऱ्यांनी बँकेकडून लाखो रूपयांचे कर्ज उचलले आहे़ मात्र, अनुदान मिळत नसल्याने बँकेचे कर्ज थकीत गेले असून, लाखो रूपयांच्या व्याजाचा भुर्दंडही शेतकऱ्यांना सोसावा लागत आहे़ कार्यालयीन चुकांमुळेही अनेक शेतकऱ्यांना हरितगृहामध्ये जरबेरा लागवड करूनही लागवडीची पूर्वसंमती अद्यापपर्यंत मिळालेली नाही़
एकीकडे सततचा दुष्काळ, वाढलेल्या शेतकरी आत्महत्या पाहता शासनाने विविध योजनांच्या माध्यमातून शेतकऱ्यांना प्रगतीच्या वाट्यावर आणण्याचा प्रयत्न सुरू केला आहे़ मात्र, प्रशासनाच्या गलथान कारभारामुळे शासनाच्या उद्देशालाच हरताळ फासली जात असल्याचे चित्र आहे़ दरम्यान, पाठपुरावा करूनही न मिळणारे शासकीय अनुदान, बँकांचा कर्जासाठी सुरू असलेला तगादा याला कंटाळून शेकडो शेतकऱ्यांनी सोमवारी जिल्हाधिकारी कार्यालयासमोर आमरण उपोषण सुरू केले़
या उपोषणात अच्यूत गुंड, रत्नाजी गुंड, देवराव पवार, प्रमोद आगळे, कैलास पाटील, लक्ष्मीकांत ताड, प्रदीप रणखांब, सुजित पवार, प्रशांत रणखांब, अनुसया माळी, मनोहर पवार, अरूण वरकंडे, विरभद्र शिराळ, शंकर बोचरे, विकास ढवळे, ज्ञानेश्वर गुंड, भारत शितोळे, प्रशांत जाधव, शेषेराव पवार, धनराज गाते, राजेश्वर मसे, विशाल साठे आदी शेतकरी सहभागी झाले असून, अनुदान मिळत नाही, तोपर्यंत हे उपोषण सुरू राहणार असल्याचा इशाराही देण्यात आला आहे़