बीडमध्ये अफूची शेती करणा-या २५ शेतकर्‍यांना सक्तमजुरीची शिक्षा

परळी तालुक्यात बेकायदेशीरपणे अफू लागवड केल्याप्रकरणी २५ शेतकर्‍यांना दोषी ठरवत सोमवारी येथील जिल्हा व सत्र न्यायालयाने त्यांना दहा वर्षे सक्तमजुरीची शिक्षा सुनावली.

अंबाजोगाई : परळी तालुक्यात बेकायदेशीरपणे अफू लागवड केल्याप्रकरणी २५ शेतकर्‍यांना दोषी ठरवत सोमवारी येथील जिल्हा व सत्र न्यायालयाचे अंबाजोगाईतील तिसरे अपर व सत्र न्या. एन.एस. कोल्हे यांनी दहा वर्षे सक्तमजुरी व प्रत्येकी १ लाख रुपये दंड अशी शिक्षा ठोठावली. तर १३शेतकर्‍यांची निर्दोष मुक्तता करण्यात आली. २0१२मध्ये अफू शेतीचे प्रकरण उघडकीस आले होते. राज्यभर गाजलेल्या या प्रकरणात अडकलेले शेतकरी अनेक दिवस जेलमध्ये होते. अफूप्रकरणी एकाच वेळी इतक्या मोठय़ा शेतकर्‍यांना शिक्षा होण्याची ही पहिलीच घटना आहे.
सुरेश नवृत्ती शेप, पांडुरंग नवृत्ती शेप, संभाजी लिंबाजी शिंदे, बालासाहेब लिंबाजी शिंदे, आत्माराम विनायक शेप, उद्धव विठ्ठल मोरे, मधुकर माणिक शेप, भास्कर त्रिंबक शेप, उद्धव गणपती देशमुख, सदाशिव रघुनाथ थावरे, ज्ञानोबा कोंडीबा मोरे, नवनाथ रघुनाथ थावरे, भीमराव कोंडीबा शिंदे, विष्णू कोंडीबा शिंदे, शेख पाशु शेख महेबुब, भीमराव नेमा राठोड, दिना नेमा राठोड, लाला रामभाऊनिंबाळकर, भगवान कोंडीबा शिंदे, बिभिषण नारायण शेप, हरिभाऊ मुकुंद कोकाटे, सुरेश नेमा राठोड, शिवाजी दगडू राठोड, चंद्रसेन दत्ताेबा थावरे, बापू दत्ताेबा थावरे अशी शिक्षा सुनावलेल्या शेतकर्‍यांची नावे आहेत.
परळी तालुक्यातील मोहा, वंजारवाडी, घोलपतांडा या ठिकाणच्या ३९शेतकर्‍यांनी २६ एकर दोन गुंठे शेतजमिनीत बेकायदेशीरपणे अफुची लागवड केली होती. हा प्रकार सिरसाळा पोलीस स्टेशनला माहित झाल्याने २४ फेब्रुवारी २0१२रोजी पोलिसांनी कारवाई करून २७ हजार ७७0किलोग्रॅम अफुचे ओले पीक जप्त केले. याची किंमत एक कोटी ३६ लाख रुपये होती. या प्रकरणी सिरसाळा पोलीस ठाण्याचे तत्कालिन पोलीस निरीक्षक लक्ष्मण विठ्ठल मंकावार यांच्या फिर्यादीवरून ३९ शेतकर्‍यांविरूद्ध कलम १८ (ब) ४६ एन.डी.एस. व कलम १९८५च्या अनुवैज्ञानिक औषधी प्रतिबंधक कायद्यान्वये गुन्हा नोंद झाला.या प्रकरणाचा पोलीस तपास बीड येथील गुन्हा व अन्वेशन शाखेचे तत्कालिन पोलीस निरीक्षक सुदर्शन मुंडे यांनी केला. या प्रकरणीे पोलिसांनी ३८ जणांना अटक केली होती तर एकजण फरार राहिला. 
पोलीस तपासानंतर हे प्रकरण सुनावणीसाठी अंबाजोगाईतील तिसरे अप्पर व सत्र न्यायाधीश एन.एस. कोले यांच्या न्यायालयासमोर आले. सरकार पक्षाच्या वतीने सरकारी वकील किशोर गिरवलकर यांनी २६ साक्षीदार तपासले. व आरोपीविरूद्ध सबळ पुरावे सादर केले. तपास पोलीस अधिकारी यांनी घटनास्थळाची व्हीडिओ चित्रफीत न्यायालयासमोर सादर केली. पुरावे ग्राह्य धरून अफुची बेकायदेशीरपणे लागवड करणे, लागवड केल्याची माहिती दडविणे व मनोवैज्ञानिक औषधी प्रतिबंध कायद्यान्वये या २५ जणांना दोषी ठरवून प्रत्येकी दहा वर्षे सक्तमजुरी व प्रत्येकी एक लाख रुपये दंड तसेच कलम ४६ अंतर्गत सहा महिने तेरा शेतकर्‍यांची पुराव्याअभावी निर्दोष मुक्तता करण्यात आली. यातील कायम फरार राहिलेला व्यापारी सुकविंदरसिंह दर्शनसिंग धिल्लो या घटनेपासून आजतागायत फरार आहे.

￭ अफू लागवड प्रकरणाची अंबाजोगाईच्या जिल्हा व सत्र न्यायालयात सुनावणी होणार असल्यामुळे मोहा, घोरपडतांडा व वंजारवाडी, पंचक्रोशीतील शेतकर्‍यांनी न्यायालयात गर्दी केली होती.