आंतरराष्ट्रीय योग दिनासाठी जिल्हा सज्ज

उस्मानाबाद : २१ जून रोजी साजऱ्या होणाऱ्या आंतरराष्ट्रीय योग दिनाच्या पार्श्वभूमीवर जिल्ह्यात जोरदार तयारी करण्यात येत असून, विविध शाळा, महाविद्यालयात विद्यार्थ्यांना तज्ज्ञांमार्फत याचे प्रशिक्षणही दिले जात आहे. दरम्यान, या दिनाच्या जनजागृतीसाठी शनिवारी शहरातील प्रमुख मार्गावरून दिंडीही काढण्यात आली.
रविवारी सकाळी ६ ते ८ या वेळेत येथील पोलिस मुख्यालयाच्या मैदानावर योग दिनाचा मुख्य समारंभ होणार आहे. यासाठी पतंजली योग समिती, नेहरू युवा केंद्र, जिल्हा क्रीडाधिकारी, सर्वशिक्षा अभियान, आर्ट आॅफ लिव्हींग, ब्रह्मकुमारीज, रोटरी क्लब यांच्यासह शासकीय कार्यालये, स्वयंसेवी संस्था, विविध संघटनांनीही पुढाकार घेतला आहे. जिल्ह्यातील शाळा, महाविद्यालयांतूनही याची जोरदार तयारी करण्यात येत आहे. यानिमित्त शनिवारी शहरात जनजागृती दिंडी काढण्यात आली. भानुनगरमधून निघालेली ही दिंडी सेंट्रल बिल्डींग, जिल्हाधिकारी कार्यालय, शिवाजी पुतळा, देडपांडे स्टँड, नेहरू चौक, माऊली चौक, काळा मारूती मंदिर, पोस्ट आॅफिस, अंबाला हॉटेल, लेडीज क्लब, जिजाऊ चौक, समता नगर,अ ानंद नगर, राम नगर मार्गे भानुनगरात पोहोंचली. दिंडीमध्ये योग दिनाबाबत माहिती सांगितली जात होती. तर टमटमवर या दिवसाचे महत्त्व सांगणारे बॅनर लावण्यात आले होते. ‘भारत माता की जय, योग दिन भारतीय संस्कृतीचा गौरव’ अशा घोषणाही देण्यात येत होत्या.
येथील रा. प. महाविद्यालयात यानिमित्त १५ जूनपासून सकाळी ६ ते साडेसात या वेळेत योगाचे प्रशिक्षण दिले जात आहे. यात योग शिक्षक प्रा. डॉ. व्ही. बी. काशीद हे मार्गदर्शन करीत आहेत. सीटी प्राईड इंग्लिश स्कूलमध्येही शनिवारी शासकीय रुग्णालयातील आयुष विभागाचे डॉ. उजमा सय्यद आणि डॉ. नौशीन खान यांनी विद्यार्थ्यांना एलसीडी प्रोजेक्टरच्या मदतीने योगाचे प्रात्यक्षिक दाखविले. यावेळी प्राथमिक, पूर्व प्राथमिक, माध्यमिक, तसेच जीवन ज्योती नर्सिंग महाविद्यालयातील विद्यार्थिनीही उपस्थित होत्या. तसेच लिटल स्टार शाळेतही पतंजली योग समितीच्या वतीने विद्यार्थ्यांना प्रशिक्षण देण्यात आले. यावेळी योगशिक्षिका साधना तावडे, कल्पना बोरा, वैशाली उपासे यांनी प्रशिक्षण दिले.
उस्मानाबाद तालुक्यातील उपळे (मा) येथील भाई उध्दवराव पाटील प्रशालेत जवळपास चारशे विद्यार्थ्यांना कटके, अमोल घोगरे यांनी योगाचे प्रशिक्षण दिले. यावेळी मुख्याध्यापक डी. एम. कुलकर्णी यांच्यासह शिक्षक, कर्मचारी उपस्थित होते. येथील नेहरू युवा केंद्राच्या वतीने व कल्याणसागर समूहाच्या सहकार्याने परंडा येथील कल्याणसागर माध्यमिक शाळेच्या मैदानावर हा दिवस साजरा करण्यात येणार आहे. परंडा शहर व तालुक्यातील नागरिकांसाठी हे शिबीर खुले राहणार असल्याची माहिती संयोजकांनी दिली. (प्रतिनिधी)