पैठण: जायकवाडी धरणाखालील पुलावरून गोदावरी नदीचे पाणी कावडीत भरताना तोल जाऊन पात्रात पडल्याने एका तरूणाचा शनिवारी मृत्यू झाल्याची घटना घडली आहे. लक्ष्मण भीमराव पवार (३१) रा.ज्योतिबाचीवाडी ता.कर्जत जि. अहमदनगर असे मयत तरुणांचे नाव आहे. गावातील कुलदेवतेच्या यात्रेनिमित्त गोदावरीचे पाणी घेऊन जाण्यासाठी तो गावातून आलेल्या कावड यात्रेत पैठण येथे आला होता.
याबाबत पोलीसांनी दिलेल्या माहितीनुसार ज्योतिबाचीवाडी येथे कुलदेवतेचा यात्रा उत्सव साजरा करण्यात येतो. प्रथा परंपरेनुसार या गावातले तरुण पैठण येथील गोदावरीचे पवित्र पाणी घेऊन जाण्यासाठी पैठण येथे येतात. शुक्रवारी गावातल्या तरुणासोबत पाण्याची कावड घेऊन जाण्यासाठी लक्ष्मण भीमराव पवार हा तरुण आला होता. शनिवारी सकाळी ९ वाजेच्या दरम्यान धरणालगतच्या पुलावरुन अचानक तोल गेल्याने खाली पडला. यात डोक्याला जखम झाली व तो पाण्यात बुडाला.
यावेळी परिसरातील नागरिकांनी त्यास वाचविण्याचा प्रयत्न केला परंतु यश आले नाही. खबर मिळताच पोलिसांनी स्थानिक नागरिकांच्या मदतीने लक्ष्मण पवार यास पाण्याबाहेर काढून शासकीय रुग्णालयात हलवले परंतु डॉक्टरांनी तपासून त्यास मृत घोषित केले. घटनेची नोंद पैठण पोलीस ठाण्यात घेण्यात आली असून पुढील तपास पोलीस निरीक्षक लक्ष्मण केंद्रे यांच्या मार्गदर्शनाखाली पोलीस उपनिरीक्षक सतीश भोसले, गोपाळ पाटील, सहाय्यक फौजदार सुधीर वाव्हळ , पोलीस जमादार भाऊसाहेब ठोकळ हे करीत आहे.