सार्वजनिक शांतता भंगप्रकरणी लातुरात ५५ जणांविरुद्ध गुन्हा

लातूर : शहरात रामनवमीनिमत्त विनापरवाना मिरवणूक काढत डॉल्बीचा निर्धारित डेसिबलपेक्षा अधिक आवाज करुन, सार्वजनिक शांतता भंग करुन, वाहतुकीस अडथळा निर्माण केल्याप्रकरणी एका संघटनेच्या अध्यक्षासह ५५ जणांविरोधात शिवाजीनगर पोलिस ठाण्यात गुन्हा दाखल करण्यात आला़
रामनवमीनिमत्त एका सामाजिक संघटनेच्यावतीने सकाळी अंबाजोगाई रोडवर विनापरवाना मिरवणूक काढत डॉल्बीचा निर्धारित डेसिबलपेक्षा अधिक आवाज करुन, गोंधळ घालणाऱ्या कार्यकर्त्यांना पोलिसांनी रोखत डॉल्बी आणि इतर साहित्य जप्त केले. डॉल्बीचा मोठ्याने आवाज करुन सार्वजनिक शांतता भंग केल्याप्रकरणी संघटनेचे अध्यक्ष योगेश चामे, अनिल पांढरे, दत्ता ढमाले, पांडू पारगावे या पदाधिकाऱ्यांसह ५५ जणांविरोधात शिवाजीनगर पोलिस ठाण्यात कलम १३४, १११, १२/१७ मुंबई पोलिस कायद्याप्रमाणे गुन्हा दाखल करण्यात आला आहे. रामनवमीनिमित्त विनापरवाना मिरवणूक काढत वाहतुकीस अडथळा निर्माण केल्याचा अयोजकावर ठपका ठेवण्यात आला असून, डॉल्बी आणि डीजेचा आवाजही निर्धारित डिसेबलपेक्षा अधिक असल्याचेही म्हटले आहे.